U Raj u ‘mastermind’ ha lyndet ka jingjia shah pyniap ba triem u tourist na Indore

Syllad | The Rising MeghalayaJune 13, 2025

Ka jingtohkit jong ki pulit ka la lap ba u Raj Kushwaha u dei u nongsylla ba nyngkong eh ne ‘mastermind’ ha lyndet ka jingjia shah pyniap ba triem jong u tourist na Indore u Raja Raghuvanshi uba dei u kurim ka samla jong u ka Sonam Raghuvanshi ha Sohra.

Ha ka sngi kaba nyngkong jong ka jingtohkit la shem ba ka kam iasylla pyniap ka dei kaba la thmu lypa wat naduh shwa ba ka Sonam kan pyndep ia ka jingiathoh shongkurim bad u Raja, bad ki laingut ki runar kiba donkti, kim contract killer ba shah thong pisa hynrei ki dei ki paralok ba iajan jong u Raj.

“Ka Sonam mynta ka la pdiang ia ka jingdonkti jong ka. Kane ka jingjia baroh ka la sdang naduh Indore, kata naduh shwa ba kan pyndep ia ka jingiathoh shongkurim bad u Raja la iasylla ban pyniap ia u, bad uba nyngkong eh u dei u Raj. Ka Sonam ka la iashim bynta lang ha kane ka jingiasylla,” ong u Superintendent of Police ka East Khasi Hills, u Bah Vivek Syiem haka 12 tarik Jylliew haba iasam ia ki jingtip ba bniah halor ka jingtohkit kaba dang bteng pyrshah ia ka Sonam, u Raj bad ki laingut kiwei pat ki runar kiba donkti, kata u Akash Rajput, Vishal Singh Chauhan bad u Anand Kurmi da ka kynhun Special Investigation Team (SIT) hadien ba ka Iingkashari ka la aijingbit phra sngi ban pynlong ia ka jingtohkit.

U la ong ba kine ki laingut ki khynnah samla ki dei ki paralok ba iajan bad uwei na ki u dei uba shipara arkmie bad u Raj, bad bynrap, “Kam dei satia kum ka jingai nong (contract killer) kaba ki la iasylla. Hooid ka jingthmu ka long ban pyniap hynrei la leh halor ka nongrim ban pynhun ia u paralok jong ki u Raj.”

Ka jingtohkit ka la lap ruh ba kine ki runar ki la pyrshang lah kumba katto katne sien hynrei ka la pulom tad haduh ba ki la pyndep ia kane jingthmu ban pyniap ia u Raja ha Weisawdong ha ka 23 tarik u Jymmang ba la dep.

“Ha ka jingshisha naduh u bnai Rymphang ba la dep ha Indore ki la pyrkhat ia ki lad ki lynti ha kaba ka Sonam kan jah rngai bad lehse hadien ka jingjah rngai yn pynwan ha ka rukom ba ka la shah rah ha ka wah. Kawei pat ka long ban pyniap ia kano kano ka briew bad pynshong ia ka ha ka scooty bad thang haduh ban ym ithuh shuh ia ka met bad ban kam ba ka dei ka Sonam, hynrei baroh kine ki jingthmu ki la pulom,” u la ong.

“Kumta haba u Raja bad ka Sonam ki la pyndep ia ka jingiathoh shongkurim bad ba ki la wan ban lehniam sha Kamakhya, kawei pat ka kynhun ruh ka la wan sha kane ka jaka. Ha ka jingshisha, kane ka kynhun ki laingut ki briew ki la wan khyndiat sngi hashwa ka 19 tarik u Jymmang bad ki la iasylla ban pyniap ia u Raja ha ki bynta ka sor Guwahati. Hynrei, namar kam sngew long ha kane ka jaka ruh, ka Sonam ka la thmu ban wan sha Shillong bad nangta sha Sohra bad dei hangne ba ki la iasylla ha kaba ki la iakynduh lang ha Nongriat bad na Nongriat ki la wan ryngkat lang bad ha ka lynti sha Weisawdong u Raja katba u dang iadon lang hapoh kane ka parking lot, kine ki runar uwei hadien uwei ki la thombor ia u da kaba mait da ki tiar pynmynsaw. Ka Sonam ka la don ryngkat lang ha kane ka jaka hadien ba ia ka metiap jong u Raja ki la bret sha katei ka riat. Kane ka jingjia ka la jia hapdeng ka por 2 haduh 2.18 nohphai sngi hashwa ba kin sa mih noh mardor na kane ka jaka,” bynrap u SP.

Ia ka metiap jong u Raja kaba la sdang kem pyut la lapdien na ka jaka riat ha Weisawdong ha ka 2 tarik u Jylliew.

Da kaba pynpaw ba ka dei ka jingjia kaba shai bha halor jingïadei jingieit, u Bah Vivek u la ong, “U Raj u dei u ‘mastermind’. Kine ki dei ki paralok jong u bad kiba la kwah ban pyniap ia u ha ki jaka bapher bapher. Nga kwah ban pyntip sha phi ba nyngkong ki la kwah ban pyniap noh ia u ha ki bynta jong ka sor Guwahati hynrei kam shym la urlong, ki la kwah ban pyndep noh ha Nongriat hynrei kim shym la lap ia ka jaka ban bret ia ka met jong u, ki la thmu ban pyniap hadpeng ka Mawlakhait bad Weisawdong ha ka por ba u Raja u dang leit shabar hynrei kane ruh kam shym ka seisoh, hynrei ha kaba khatduh ki la pyndep ia kane ka jingthmu ha Weisawdong.”

U la ong ruh ba ka jainjri (raincoat) kaba ka Sonam ka phong ka la ai noh ia u Akash namar ka sopti jong u ka la khah snam.

“Ha ka jingshisha kawei na ki scooty ka dei kaba la niah da ka Sonam ha ka por ba ki la mih na Weisawdong. Hadien ba ki la poi ha Evi point, u Akash u la hiar noh hangne ban bret ia ka raincoat namar ka don dak khah snam. Ha ka por ba ngi la lap ngim pat thikna la ka dei ka jingkhah snam ne kiwei pat hynrei mynta ngi la pynthikna ba ka dei ka dak snam bad ngi la phah ban leh ia ka forensic,” u la ong.

U la ong ba hadien kane u Akash u la shim hi noh ia ka scooty bad ka Sonam ka la shong hadien. U Anand Kurmi u la niah ia ka scooty ia kaba ka Sonam bad u Raja ki la shim wai bad iehnoh ia ka ha Sohra Rim bad nangta tad hadien ba la poi ha Lad Mawphlang (ki pulit ki dang pyrshang ban pynthikna ha kano ka jaka) ka la kiew noh da ka taxi bad u Vicky uba dei u Vishal Chauhan u la ai ia ka da ka jain tap khlieh ne burqa kaba u Raj u la ai ha u. Ka Sonam ka la tap da ka burqa bad wan sha Police Bazar bad hiar sha Guwahati da ka kali tourst bad ha Guwahati ka la leit sha ISBT bad shong ka bus sha Siliguri bad nangta ka la kiew sa da kawei pat ka bus sha Patna bad na Patna da kawei ka bus sha Arrah bad hadien da ka rel sha Lucknow bad na Lucknow da ka bus sha Indore.

Hadien ka jingioh khubor halor ka jingiathuh da ki tourist guide shaphang kine ki shijur na Indore kiba la don ryngkat lang bad ki laingut ki shynrang, u Bah Vivek u la ong ba u Raj u la ong ia ka Sonam ba kan bha ba kan mih noh na Indore bad wanphai sha ki bynta ka Siliguri bad ban mih paw kum ka lanot kaba shah rahbor.

Ha ka por ba ka Sonam ka thmu ban mih na Indore ban leit sha Siliguri ha ka 8 tarik Jylliew, ki artylli ki kynhun na Meghalaya ki la ioh ban kem noh nyngkong ia u Akash na Uttar Pradesh. U Raj u la ioh jingtip ia kane hynrei um sngew thikna ba ka dei ka kynhun ki pulit.

“Ki nangkyrmen ba yn ym don ba lapdien ia ka metiap namar ka don ha ka jaka riat kaba jylliew bad jngai bad ka (Sonam) kan leh mynleh kum ka lanot bad lehse ka lah ban nangtharai ba ka jingtohkit kan shim por kumba shi bnai ar bnai bad ka metiap kan sa pyut noh bad ngin ym ioh jingtip. Kumta ka la shim ia ka bynta kum ka lanot,” ong u SP.

Haba kylli, u Bah Vivek u la ong ba ka Sonam ka la kam ba ka la shah pynbor ban iathoh shongkurim bad u Raja bad kane ka dei ka daw kaba lam sha kane ka kam pyniap.

Haba pynpaw ba ki pynlong ruh ia ka jingtohkit ha kaba iadei bad ki kam pisa bad ki jingdon jingem, u SP watla katta u la ong ba ym shym la siew bun ka pisa sha kitei ki laingut ki runar namar ba ki dei ki paralok. U la ong ba u Raj u la ai ha ki T.50,000 na ka bynta ki jingpynlut pynsep.

Nalor kata u SP u la ong ba hadien ba ki la lap ia ki jingshisha baroh halor kan ka jingjia lyngba kine ki runar kiba donkti, ki pulit kin lum ia ki sakhi satar bad ialam ia ki sha Sohra na ka bynta ban pynwandur biang ha kaba iadei bad kane ka jingjia baroh. U la pynpaw ruh ia ka jingsngew skhem ba kin lah ban chargesheet hashwa ka 90 sngi.