U Hep Dhar u Dolloi ba pura ka Elaka Nartiang

Syllad | The Rising MeghalayaJuly 29, 2019

JOWAI: U Ma Hep Dhar ula jop donburom kum u Dolloi ba pura jong Elaka Nartiang.

Ka Returning officer Dolloiship Election jong ka Jaiñtia Hills Autonomous District Council (JHADC) ka Kong E Shylla kala pynbna ba u Hep Dhar ula jop da 381 vote hadien ka jingianiew vote kaba long haka sngi Nyngkong ha MDC Hostel.

Naki 35 tylli ki shnong hapoh ka Elaka Nartiang kiba thep vote ki don 5687 vote, u Hep Dhar ula ïoh vote 2949 vote, u Salong Lamare ula ïoh 2568 vote bad u Jointing Dhar ula ïoh tang 26 vote bad 144 vote ki dei ki bym larkam.

Kumban shu pynkynmaw ba ka jingpynlong ia ka jingjied Dolloi ha Elaka Nartiang ka long hadien ka jingkhlad noh u Doloi barim u (L) Don Dkhar naduh u snem 2016 kumjuh ruh u Acting Doloi (L) R Symblai ha u snem 2018.

U Ma Hep Dhar haba kren ula ong “ngan ai ka jingshakri kaba hok ïaki khun ka Elaka baroh khlem da niew shilliang khmat.”