U Evermore Rymbai u president ba thymmai ka Kiang Nangbah Government College Students’ Union

Syllad | The Rising MeghalayaSeptember 22, 2023

Ka Kiang Nangbah Government College Students’ Union (KNGCSU) haka sngi Thohdieng kala pynlong iaka jingjied nongkitkam ba thymmai naka bynta ka samoi treikam 2023-24. U Evermore Rymbai ula shah jied kum u president bathymmai jong ka KNGCSU.

Iaka resol la pynbna da ka Returning Officer ka Dr. EM. Blah kaba dei ruh ka principal ka kolej bad kala pynbam smai iai nongkitkam thymmai. La iadonlang u Wankhraw Kupar Kharbuli MCS, Additional Deputy Commissioner West Jaintia Hills District bad ki nonghikai.

Kane ka jingjied thymmai iaki nongkitkam ka kynthup iaki 12 tylli ki post bad la wan ban iashimbynta ban jied da ki 1524 ngut ki samla pule.

Nalor u samla Evermore Rymbai uba pule haka kyrdan BSc 5th Semester, iaka kam vice president la shah jied da u Meiaidonlang Tang, general secretary u Daiatreilang Synnah, assistant general secretary ka Delis Shylla.

Kiwei pat ki nongkitkam bathymmai ka Union ki kynthup ia u Heibormi Lamare kum u Student- Editor, ka Naphisabet Latam kum ka Secretary Cultural Affairs (Music & Drama), u Hameisainkupar Shadap kum u Secretary Debate & Symposium, u Damesha Lyngdoh kum u Secretary Indoor Game & Sports, u Eningstar Lytep kum u Secretary Outdoor Games & Sports, ka Hilarity Dkhar kum ka Secretary Social Services, u Banteiskhem Suchiang kum u Secretary Boy’s Common Room bad ka Obedience Lapasam kum ka Secretary Girl’s Common Room.