U drok u nongpynjot ba khraw ia ka lawei jong ki samla, ong u Bah Banteidor

Syllad | The Rising MeghalayaAugust 30, 2023

U MLA ka Mawkynrew u Bah Banteidor Lyngdoh u la ong ba u drok u dei u nongpynjot ba khraw na ka bynta ka lawei jong ki khynnah samla, bad  la sakhi ruh ia ka jingnang kiew ha ka jingdon ki nongpyndonkam drok hapdeng ki samla ha ka jylla katba nang mih ki sngi ki por.

Haba kren ha ka jingialang pynkup burom ba la tip kum ka ‘Mawkynrew Academic Excellence Award 2023’ hapoh  Good Shepherd Higher Secondary School, Jongksha ha ka 26 tarik mynta u bnai, u Bah Banteidor u la pynpaw ka jingsngewkhia kaba jur namar u drok u la pynjot bad tehmraw ia ka jingim jong kiba bun ki khynnah samla.

U la ong ba ki kmie ki kpa ki trei shitom bad ki shah jynjar ban iohi ia ki khun ba kin pule hynrei bun na ki khun samla ki pyrkhat ba ka lawei kam long kaba shai namar ka jingduna ki lad ioh kam.

Da kaba ai mynsiem ia ki samla pule ba kin iaid sha khmat ha ki jingpule, u la ong, “Ka pule puthi kam dei eh tang ban ïoh kam ioh jam hynrei kan saiñdur ia uwei pa uwei ban lah ban ïakhun ïa kino kino ki jingeh. Lada phi don ïa ka rai kaba skhem bunsien ki lad ki lynti ki plie ban poi sha ka jingangnud kiba phi thrang ban pynurlong ha ka jingim.”

Ha kawei pat ka liang, u MLA ka thain u la ong ba ka jingjur ka jingpep skul shiteng por ki samla ka dei namar ka jingbym don ki skul pule hajan. “Bun ki hap ialeh ban beh sha Shillong bad na ka daw ka jingduna ka ioh ka kot ha ki longïing bunsien ki samla ki hap ban iehnoh shiteng por ïa ki jingpule”, u la ong.

Kumta ruh u la ong ba khnang ban lah ban weng ia kane ka jingeh, kum u nongmihkhmat ka thain u dang iai buddien ban pynurlong ia ka College ha kane ka thain na ka bynta ka jingmyntoi ki samla.

Ha kane ka prokram la ioh ruh ban sam khusnam sha ki samla kiba la wan shakhmat na ka Secondary School Leaving Certificate and Higher Secondary School Leaving Certificate.Na ka liang u MLA u la pynkup burom ruh ia lai ngut ki briew kiba la paw sha khmat ha ka imlang sahlang.

Kine ki kynthup ia u nongioh khusnam Padma Shree, u Bah Risingbor Kurkalang ha ka liang ka shna tiar tem bad rwai tynrai, ka Kong Sbunbha Kharumnuid kaba dei ka nongthoh poetry bad ka Dr Amanda A Pakynteiñ, kaba dei ka nonghikai skul step kaba la ioh khusnam Best Woman Guru Award na ka 4th International Inspirational Women Awards (IIWA) mynta u snem.