U Dr HH Mohrmen kum uwei na ki kyrtong na Jowai Constituency

Syllad | The Rising MeghalayaMay 22, 2022

U Dr HH Mohrmen uwei na ki nongthoh columnist bad u nongthoh khubor ha ki snem mynshuwa bad uba la iehnoh iaka kam pastor jong ka Balang Unitarian dangshen ula pynbna ba un aireng haka elekshon MLA 2023 na Jowai Constituency.

Ka elekshon sha ka iing dorbar thawaiñ jong ka Meghalaya Legislative Assembly ka dang sah sa 10 bnai, hynrei ka politik ha kylleng ka jylla kala sdang ban shit bad ki party bapher bapher kila sdang ban wad iaki kyrtong kiba lah ban poi sha ka thong.

U Dr Mohrmen uba la rai la kham slem ia kane ka kam ba un rung sha ka jylli jong ka sain hima sima, ula shim iaka rai ban pynbna syndon ba un ieng ban iakhun iaka elekshon haka sngi Saitjain haka jingpyllait paidbah iaka kot kaba ula thoh “Ki Kjat Jingshai ka mynnor” haka jingialang kaba long ha HK Singh Memorial Secondary School, Jowai.

Pule | Ka jabieng ruh ka donkam jingbam: P Kynjing Dolloi Jowai

Haba ïakren bad u Dr. HH Mohrmen ula ïathuh “Ka daw kaba kongsan kaba pynlong ïa nga ba ngan ïaleh ha kane ka elekshon ka dei ka jinghiar arsut ka saiñ hima sima hapoh ka jylla kaba pynduh jingkyrmen ïa uba bun balang. Ka jingïaleh pyrshah jong nga ka dei ïaka bamsap bampong kaba la pyntroiñ ymtang ïa ka synshar khaddar hynrei ïa ka jylla hi ruh”.

Ula ïathuh ba na ka liang jong u, un ïaleh khlem da shaniah ha pisa. Ula ong baroh shi katta ki briew ki ong ba um lah ban jop ilekshon khlem pynlut pisa.

“Nga kwah ba ka Jowai constituency kan jubab ïa kane ka jingkylli ha u 2023, la ka long kaba shisha ne kaba bakla ba khlem ka pisa ym lah ban jop ilekshon”, la ong u Dr. HH Mohrmen.

Ha kaba iadei bad ka party ba un iakhun un sa pynbna ha ki khyndiat sngi ban wan.