U dei u briew uba kyrpang u shah jied ban mihkhmat iaka Ri India

Syllad | The Rising MeghalayaOctober 12, 2022

Watla u dei u briew uba kyrpang uba thlun haka ktien haka thylliej bad uba kyllut, pynban ka khubor kaba lam sngewtynnad ka long ba ula shah jied pat ban mihkhmat iaka Jylla Meghalaya bad Ri India sha ka Turkey.

Kane ka jingshah jied jong u, ka dei na ka sap kaba tbit jong u kum uwei na ki nongialehkai khun kti ne Arm Wrestling. Ula shah jied ban mihkhmat iaka ri sha lympung ialehkai World Arm Wrestling Championship kaba 43 ha Antalya Turkey ka ban long naduh ka 14 tarik haduh 23 tarik u bnai Risaw.

Une u samla bym lait ka ktien ka thylliej, u dei uba la tip kyrteng kum u Alexander Lyngdoh uba na ka shnong Namdong, West Jaintia Hills District bad u shong wai ha Ladthadlaboh, Jowai.

Ka Indian Arm Wrestling Federation kaba iasoh bad ka World Arm Wrestling Federation kala phah iaka shithi sha une u samla ba ula shah jied ban leit iashimbynta sha katei ka lympung. Hynrei kaba sngewsih ka long ba une u samla un hap ban pynbiang dalade ia ka bai lynti jong u sha kane ka lympung kaba la kot T.1 lak 82 hajar.

Ban pynbiang iaki jingdonkam jong u ban ioh bai lynti ban ioh iashimbynta ha kane ka tournament, ula iathuh ba ula leit pan jingiarap na ki nongshong shnong bad ki riew pawkhmat ka district bad da ka jingiarap jong ki ula ioh iaka jingangnud jong u bad ula mih na Jowai ban leit iashimbynta ha katei ka championship haka sngi ba Balang.

U syllad.com haba kren u ne u samla, u la ong ba hadien ka tournament na Hyderabad kaba long ha une u snem kaba u la ioh khur ia ki gold medal kaba kynthup iaka jingiakhun kti kamon bad ka kadiang kala pynlong iaka synjuk Arm Wrestling ka ri ban jied ia une u samla ban mihkhmat iaka ri.

Ula ong ruh ba ula shimbynta ruh haka 43rd  National Arm Wrestling Championship 2019 ha Bhilai (Chhattisgarh), bad ha ka 31st Annual State level Arm Wrestling Championship 2022 kaba dang shu kut ha u bnai Jymmang 2022.

Une u samla u don ka jingsngewskhem ba un jop ha kane ka championship bad u la ong ruh kino kino kiba kwah ban ia mynsiem ia u ki la ban phone ha une mobile number jong u +91 9362232134.