U Bah Shemborlang kum u CEM bathymmai ka KHADC, u Strongpillar kum u Chairman 

Syllad | The Rising MeghalayaFebruary 28, 2025

U MDC ba nyngkong ka Voice of the People Party (VPP) na Lyngkyrdem-Laitkroh u Bah Shemborlang Rynjah haka 28 tarik Rymphang u la shah jied khlem kano kano ka jingpyrshah kum u Chief Executive Member (CEM) bathymmai ka Khasi Hills Autonomous District Council (KHADC) bad u MDC ka Mawkhar-Pynthorumkhrah u Bah Strong Pillar Kharjana kum u Chairman bathymmai.

Haba shimti kum u Chairman, u Bah Strongpillar u la pyniaid ia ka elekshon sha ka kam CEM bad u la pynbna ba u Bah Shemborlang u la shah jied khlem kano kano ka jingpyrshah kum u CEM bathymmai ka KHADC hadien ba ka liang pyrshah ka la rai ban ym pynieng kyrtong.

Ia u Bah Shemborlang la leh burom da ki MDC ka party hadien ba u la shimti ia ka shuki CEM hapoh ka Iingdorbar.

Haba kren ha ka iingdorbar, u Bah Shemborlang u la ong, “Nga ai khublei ia ka party VPP khamtam ia u president u Bah Ardent Miller Basaiawmoit uba la iohi ba nga long uba biang ban long u kyrtong jong ka party bad namar ka jingngeit bad ka jingshaniah ha nga ban shim ia ka jingkitkhlieh ban ialam ia ka KHADC kum u CEM.”

 “Nga ai ruh ka jingkhublei kyrpang ia ki paidbah ka Langkyrdem-Laikroh constituency kiba la jied ia nga kum u MDC jong ki. Nga duwai ba U Blei un ai ha nga ia ka jingstad ba ngan lah ban pyndep ia la ki kamram da ka jingsngewrit bad ka jingkitkhlieh,” u la ong.

Une u CEM bathymmai u la kular ruh ban pyndep ia ki jingkular jong ka party ban ai ia ka jingsynshar kaba khuid bad ong, “Nga dei tang ka durkhmat thymmai hynrei nga long uba kloi ban pdiang ia ki jingai jingmut lane wat ia ki jingkynthoh. Ka jingkhang ka jong nga ka plie na ka bynta baroh. Sngewbha sngew laitluid ban wan rung ha kano kano ka por.”                     

“Nga kular ruh ban shakri ia ka Council khlem kano kano ka jingleh shiliang khmat iano iano ruh,” u la bynrap.

Ha kajuh ka por une u CEM bathymmai u la pan ruh ia ka jingkyrshan bad ka jingiatreilang na ka liang pyrshah bad ong, “Nga kyrpad ruh ia phi ban shim ia ka sienjam kaba tei.”