Tyrwa u MP ka Tura ban pyniasoh ia ka lynti rel Mendipathar sha ki sorbah jong ka ri

Syllad | The Rising MeghalayaAugust 26, 2025

U MP ka Congress na Tura, u Saleng A Sangma u la tyrwa ia ka sorkar Pdeng ban pyniar bad pyniasoh ia ka lynti rel Mendipathar sha ki sorbah ba kongsan jong ka ri kum ka Kanyakumari, Mumbai, New Delhi bad Kolkata.

U Saleng u la kyntu ruh ia ka sorkar Pdeng ban wanrah ia ka rel kit mar hapoh Rilum Garo da kaba pynpaw halor ka jingdonkam ban kyntiew ia ki kam karkhana bad ha ka liang ka sengkam sengjam.

“Nga la kyntu ia ka sorkar Pdeng ba kan pyrkhat ruh ban pyniasoh da ka rel kaba sted na Mendipathar sha Kanyakumari, sha Mumbai, sha New Delhi bad Kolkata. Hadien ba la bishar bniah ia ka jinglong jingman ha Rilum Garo, Nga la kyntu ban wanrah ia ka rel kit mar ia kaba u Myntri Rangbahduh bad u Myntri ba dei khmih ki la mynjur ba kin sa peit ia kane ka kam. Lymda ngi ioh ia ka rel kit mar na Mendipathar, ka Rilum Garo kan ym ioh jingmyntoi na kane,” ong u MP haba kren sha ki lad pathai khubor ha ka 25 tarik Nailar.

U Saleng u ka pynpaw ruh ia ka jingmyntoi ha ka ioh ka kot lyngba ka jingpynbha ia ka lad pyniasoh lyngba ka rel, kaba kynthup halor ka jingshalan ia ki mar rep ba khlem pyndonkam dawai na Rilum Garo sha kiwei pat ki bynta jong ka ri. U la ong ba ia ki mar rep ba khlem pyndonkam dawai yn lah ban pyniaid iew sha ki sorbah kiba heh bad ka ban kyntiew ia ka ioh ka kot jong ki trai ri trai muluk.

Katkum ka jingong jong u, ka steshon rel Mendipathar kumba ka long mynta ka treikam tang hapdeng ka Mendipathar bad ka Guwahati khlem da don satia ka jingshakri lyngba ka rel kit mar.

U MP u la pynpaw ka jingsngewkhia halor ka jingshngain bad ka jingwan rung kyrthep ki briew kiba na bar lada pyniar ia ka lynti rel sha kiwei pat ki bynta jong ka Rilum Garo. U la pynpaw ruh halor ka jingdonkam ban don ia ki jaka talasi kiba biang ban pynthikna ia ka jingshngain jong ki trai ri trai muluk.

“Ha ka jingshisha haba phi kren halor ka jingwan rung ki briew kiba na bar, ka rel ka rung tang 14 kilomitar haduh Mendipathar na ki jaka khappud ka Assam bad haduh mynta ym pat shym la sakhi ia kata ka jingwan tuid ki briew kiba na bar, hynrei lada ngi plie ia ka jaka kaba kham heh kumta ngi donkam ruh ban khmih halor ka jingshngain kumjuh,” ong u Saleng da kaba bynrap, “Dei na kata ka daw ngam shym la pan ban pynjlan shaduh Jengjal lane sha kiwei pat ki bynta jong ka thain hynrei nga kwah tang ban pyniar tang ia kane ka steshon rel ha Mendipathar bad ka jingpyniar ia ka rel sha kino kino ki bynta jong ka ri India.”

“Ngim don ia ki jaka talasi kiba biang. Ngam tharai ba kan long kaba bit ia nga ba ngan pan ia kata tad haduh bad tad lada ka sorkar ka don da kiwei pat ki daw ban pyniar ia ka..” u la bynrap.