Tur u CM sha Iewduh hapdeng u ‘lapbah; mang ka Sorkar T.15 klur ban pynitynnad ia ka iew

Syllad | The Rising MeghalayaMay 20, 2025

Hapdeng ka jingther u ‘lapbah, u Myntri Rangbah ka Jylla u Conrad K Sangma haka 19 tarik Jymmang u la leit rung shapoh Iewduh ha kaba u la pyntip ba ka Sorkar Jylla kan pynkhreh ia ka master plan ban pynbha bad pynitynnad ia kane ka iew kaba heh tam bad kaba la rim tam ha ka jylla.

Ia kane ka rai u CM u la pynbna hadien kane ka jingleit jurip ia kane ka iew ha ka jingsyndan lang da u Symbud Myntri Rangbah u Bah Prestone Tynsong, u Myntri ka Tnad Tourism u Bah Paul Lyngdoh, ki ophisar na ki Tnad bapher bapher bad ki nongmihkhmat na ka Himda Mylliem.

Mynta ka sorkar ka la dep mang shwa T.6 klur na ka bynta ban shna pynbha ia baroh ki lynti iaid kjat kiba don hapoh kane ka iew.

“Ngi la sakhi ba ki dang don shibun ki kam kiba dang dei ban leh kumta mynta ngin pynkhreh ia ka master plan ban peit kumno ba ngin lah ban pynbha bad pynitynnad ia ka Iewduh,” ong u CM haba kren sha ki lad pathai khubor hadien ka jingjurip.

“Ngi don ka jingsngewkhia halor kane namar haduh jan kumba shi lak ngut ki briew ki shaniah ia ka kamai kajih lyngba kane ka Iewduh ha kiba bun rukom. Kumta ka long kaba kongsan ban pynthikna ba ngin pynbha bad ban kyntiew ia kane ka iew,” u la ong.

U Conrad u la ong ba ka kam ka la dep iaid lyngba kane ka jingmang pisa ba T. 6 klur jong ka sorkar. “Phi la iohi ia ki lynti iaid kjat ba la siang da ki maw ha ka rukom kaba iasyriem bad ki lynti iaid tynrai,” u la ong.

Ha kajuh ka por u CM u la pynbna ruh ia ka rai jong ka sorkar ban mang pisa sa T.15 klur na ka bynta ban pyntrei ia ki project jingtei kiba kham heh kum ki lynti iaid kjat, ki nala, ka jingtep ia ki pipe um bad kiwei kiwei.

“Ia kine ki kam donkam ban leh ha ka rukom kaba heh. Kumta, kan ym don kano kano ka jingiatyngkhuh bad ka project pynitynnad jong ka KHADC,” u la bynrap.

“Baroh hi ngi pyrshang ban pynitynnad ia kane ka jaka. Hooid kane kam pat biang satia hynrei ka thong ka jong ngi mynta ka sngi ka long ban iohi ia kiwei pat kiba dang donkam ban leh ha kaba ngi la shem ba ki don shibun ki jingeh halor ka jingtuid jong ka um bad ki nala, kumta yn kynthup lang ia kine ha ka kylla kaba ar lyngba ka project kaba T.15 klur,” ong u CM.

Nalor kata u la bynrap da kaba ong, “Hapoh ka kylla kaba ar ngi khmih lynti ba ngin lah ban khot tender kham kloi bad nga kyrmen ha kine ki khyndiat bnai ki ban wan, ngi lah ban khmih lynti ban sdang ia ki katto katne ki kam hynrei namar jong u slap ngi lah ban ym pyniaid sted ia ki kam hynrei kan ym shim por palat, kan sa urlong noh shen.”

Haba kylli, u CM u la ong, “Ngi la buh ia ka project jong ka Iewduh hapoh ka NEC scheme bad katto katne ka pisa ka la wan lyngba ka NEC bad katto katne yn bei lyngba ka sorkar jylla, bad hadien habud na ka bynta ki jingtei kiba heh ngin sa nang wad ia ki lad ki lynti- barabor ngi ngeit halor kata, bad la kalong na ka sorkar pdeng ne sorkar jylla, ka thong hi ka long ban pyndep ia ka kam.”

Ha kane ka jingleit iuhkjat ha Iewduh u Conrad u la ioh ruh ia ka lad ban iakren bad ki nongdie madan, ki nongrep bad ki nongshong dukan bad ong, “Ngi la ioh ia ki jingai jingmut kiba sngewtynnad bad ngi buh jingmut bha ia ki. Hynrei, u la ong ba kin ym lah satia ban pynheh ia ki lynti ba khim namar ka jingdon jong ki dukan.”