Tur paidbah ki nongdie madan sha Secretariat hapdeng ka jingpynkhlain bor pahara, dawa jingialang kyrkieh ka PTVC

Syllad | The Rising MeghalayaJuly 1, 2025

Da ki spah ngut ki nongdie madan kynthei bad shynrang hapoh ka lama jong ka Meghalaya and Greater Shillong Progressive Hawkers and Street Vendors Association (MGSPHSVA) haka sngi ba Ar ki la tur paidbah sha Secretariat ban pynpaw pyrshah halor ka jingshah kyndang napoh Khyndailad bad dawa ban pynlong mardor ia ka jingialang jong ka Provisional Town Vending Committee (PTVC) khnang ban lah ban pynbeit ia ki jingeh.

Ha kane ka sngi la sakhi ruh ia ka jingsyrtap jong ki pulit hakhmat ka khyrdop jong ka Secretariat khnang ban khanglad ia kine ki paidbah ba kin ioh rung shapoh.

Ka Kong Angela Rangad haba kren na ka bynta kine ki nongdie madan ka la ong ba kane ka jingshah kyndang jong ki nongdie madan na Khyndailad ha ka sngi Nyngkong ba la lah ka dei ka jingleh kaba beain.

Katkum ka jongong jong ka, ki nongdie madan ki la leit sha ka iingbishar ban dawa ban pyntreikam pura ia ka State Vendors (Protection of Livelihood and Regulation of Street Vending) 2014 hapoh ka Jylla.

“Ngi la iaid ryngkat bad kata ka ain ban don ka jingjurip ia ka jaka, ban don ia ka jingdawa bad jingpyrshah, ban don ka jingai ia ki syrnot ban shong die jingdie. Ka dang dei ka Provisional Town Vending Committee, hynrei ngi la ong ba ha ka nongrim ba nyngkong ngin pyrshang ruh ban peit ia ka jingpynkylla bad pynkynriah jaka shong tang ha ki bynta Khyndailad bad ym baroh kawei ka jaka,” ong ka Kong Angela.

“Hynrei hynnin ka sngi Nyngkong u Chairman ka TVC ba shipor uba dei ruh u CEO  ka SMB u la ai bor ban kyndang ha ka nongrim jong ka jing peit bniah ïa ki kot ki sla jong ka jingdie madan. Kane ka long kaba beain namar kim tip ruh wat ia kaei kaba ki leh namar ki la rah noh ruh ia ki mar ki mata jong ki nongdie kiba la don ia ki syrnot ban shong die jingdie. Kumta ngi la ong ba ki dei ban sangeh mardor ia kane ka jingleh bad ngi ki dkhot jong ka PTVC ruh ngi dawa ban pynlong mardor ia ka jingialang jong ka PTVC namar ngin hap ban pynbeit ia kine kiei kiei,” ka la bynrap.

Kane ka nongialam jong ka Thma U Rangli Juki (TUR) kaba aijingkyrshan ia ka MGSPHSVA ka la maham ruh ruh da kaba ong, “Watla ngi don ia ka ain hynrei lada ym pyntreikam hok kan long kaba kham ma shuh shuh bad kan nangwanrah jingeh shuh shuh ha kaba iadei bad kane ka phang ha ka jaka ban lah ban pynbeit ia ka.”

Ka la ong ruh ba kine ki nongdie madan ki la wan iakhih hakhmat ka Secretariat namar kat haduh mynta u Symbud Myntri Rangbah ka Jylla uba khmih ia ka Tnad Urban u Bah Sniawbhalang Dhar i kumba um patiaw ne sngewthuh ia kane ka jingeh.

“Ngi la dawa ba u (Symbud Myntri Rangbah) ban pan ia ki kot ki sla khnang ba un sngewthuh shano kane ka kam ka don mynta bad ban sngewthuh ruh balei ba katei ka jingleh hynnin ka sngi Nyngkong ka dei kaba beain, bad ngi dawa ruh ban pynlong mardor ia ka jingialang ka PTVC,” bynrap ka kong Angela.

“Na ka liang ki nongdie madan ki la byrngem ruh ban nangpynjur shuh shuh ia ka jingiakhih lada ka PTVC kam lah ban pynbeit ia kine ki jingeh bad ngin ym ailad ban pyntreikam beain ia ki kyndon ain.Phim lah ban ialam bakla ia ka ain. Kata ka dei ka nongrim kaba ngi ieng,” ong ka Kong Angela.