Tur kynsan ki spah ngut ki dkhot ka CoMSO sha Secretariat ban dawa pyntreikam ia ka ILP

Syllad | The Rising MeghalayaJune 13, 2025

Ki dkhot ka Confederation of Meghalaya Social Organizations (CoMSO) haka 13 tarik Jylliew ki la tur kynsan puk sha Secretariat ban dawa pyntreikam mardor ia ka Inner Line Permit (ILP) hadien ka jingpynslem jong ka sorkar.

Ka CoMSO ka la pynpaw ba ka ILP kan jin da la lah ban khanglad ia ka jingjia shah pyniap ba dang shen jong u tourist na Indore u Raja Raghuvanshi ha ka thain Sohra.

Ka la dawa ruh na ka Sorkar Pdeng ba kan pynbor ia ka Sorkar Jylla ba kan thaw noh mardor ia ka kynhun Special Investigation Team (SIT) khnang ban lapdien bad ban kem ia kiba wan rung beain napoh Bangladesh bad Myanmar.

“Ngi dawa ban pyntreikam mardor ia ka ILP ha ka jylla Meghalaya,” ong u Chairman ka CoMSO uba ei ruh u president ka Seng Hynniewtrep Youth Council (HYC) u Bah Roykupar Synrem haba kren  sha ki lad pathai khubor.

U la ong ba ym shym la ioh jingtip satia la ka Ministry of Home Affairs (MHA) ka pdiang ne em ia ka rai ba la mynjur da ka Iingdorbar Thaw ain ka jylla ha u snem 2019.

“Ha ka jingiadei bad kaei kaba la jia ha kine ki khyndiat sngi ba la dep, ngi tip ba ka la don ka kam pyniap briew ha ka jylla Meghalaya da ki ki katto katne ki briew kiba dei na kiwei pat ki jylla. Jin da la treikam ka ILP ha ka jylla kiba shah kynnoh donkti pyniap ia u Raja kin jin da la pyrkhat shwa ban leh ia kane ka kam pyntriem. Lada ngi don ia ka ILP ia ki jingtip kiba bniah jong kine ki briew yn jin da ka pynrung ha ka register ha ka por ba ki wan rung sha Meghalaya,” ong u Bah Synrem.

U la ong ruh, “Ka Meghalaya ka la hap ban pynlut pynsep ha kaba iadei bad ka jingwad ia ka Sonam. Lada treikam ka ILP ngin jin da la ioh jingtip ba ka la leit sha Indore hadien ba ka la leh ia ka kam pyntriem. Dei na kata ka daw ba ka ILP ka long kaba donkam khnang ba ngin ioh ia ki jingtip kiba bniah jong ki briew kiba rung ba mih na ka jylla.”

U la kdew ruh ba ki don bun ki khep ba ki briew ki leh ia ki kam sniew hangne bad phet rkad noh bad ki pulit ki sah ha ka umdum namar ki don ia ki jingtip kiba bniah ia ki briew kiba wan rung sha kane ka jylla.

Nalor kata une u Bah Roykupar u la ong ruh ba ka Synjuk ka la dawa ruh na ka sorkar jylla ba ka dei ban thaw noh mardor ia ka kynhun SIT ha baroh ki District khnang ban ithuh bad ban pynher krad ia ki briew kiba wan rung beain napoh Bangladesh bad Myanmar.

Hadien ka jingjia shah thombor ha Pahalgam, na ka liang ka sorkar India ka la pynmih ia ka jingbthah ia baroh ki jylla bad ki union territory ba ha kawei pa kawei ka District dei ban don ia ka kynhun SIT khnang ba yn lap bad pynphai pat ia kito ki briew kiba wan rung beain khamtam napoh Bangladesh.

“Ngim pat shym la iohi ia ka sorkar jylla ba kan leh ei ei halor kane. Ngim ngeit satia ba ym don ki nong Bangladesh ha kane ka jylla namar ka Meghalaya ka dei ka lynti iaid wat ia ki nong Bangladesh ba kin leit sha kiwei pat ki jylla jong ka ri. Kumta ngi kwah ba ka Sorkar Pdeng kan pynbor ia ka Sorkar Jylla ba kan thaw ia ka kynhun SIT kloi katba lah,” ong u nongialam ka CoMSO.

“Ngi tip ba ki briew kiba la shah kem na Mumbai, Delhi bad na baroh ki jaka ki pynpaw ba ka lynti kaba suk tam ban ioh rung sha India ka dei lyngba ka Meghalaya,” ong u Bah Roykupar da kaba bynrap “Ka HYC lem bad kiwei ki sengbhalang ki la bteng ban ioh kem ia ki nong Bangladesh na Meghalaya. Kumta kumno phi lah ban ong ba ym don nong Bangladesh ha Meghalaya. Ngi kwah ia ka sorkar jylla ba kan bud ia ka jingbthah jong ka Sorkar Pdeng.”