Tuklar ka High Court halor ka jingshah kyndang ki nongdie madan ha Khyndailad; da ka por buh ban die jingdie

Syllad | The Rising MeghalayaJuly 4, 2025

Ka Iingkashari Meghalaya High Court ka la tuklar ha kaba iadei bad ka jingshah kyndang jong ki nongshong dukan die madan ha ka thain Khyndailad bad bthah ia ki bor ba dei khmih bad ia ki bor pulit ban bud ryntih ia ki kyndon ain.

Ka seng ki nongshong die madan ka la mudui sha ka Iingkashari bad kynnoh ba ka la don ka jingshah kyndang jubor khlem da pynbiang satia da kiwei pat ki jaka shong na ka bynta jong ki.

Ha ka hukum kaba la pynmih hadien ka jingbishar ia ka PIL haka 3 tarik Naitung, ka Division Bench kaba kynthup ia u Chief Justice IP Mukerji bad u Justice W Diengdoh ki la thung ia u Senior Advocate u Subhasis Chakrawarty kum u Special Officer u ban khmih halor ka jingpyntreikam ia kine ki jingbthah.

“Nalor kata, u Special Office uba don ia ka jingshemphang kaba iar, ka jingtbit ha ka kam bad ka jinglong rangbah un pynthikna ba ba kane ka hukum kaba ngi la pynmih ha kaba iadei bad kane ka Public Interest Litigation dei ban pyntreikam khlem kano kano ka jingpynkhein ia ka shongsuk shongsain lane ban leh ia kino kino ki kam kiba pynkhein ain,” ka la ong.

Ka Bench ka la bthah ruh ia u Special Officer ba un pynkhreh ia ka thup kyrteng jong kito ki nongdie madan kiba la ioh jingithuh bad ioh laisen, ia kaba la ong ba ki don kumba 349 ngut ha ryngkat ka jingiamir jingmut lang bad ka Seng ki nongdie madan nalor ki bor ba dei khmih.

Ka Iingkashari ka la bthah ruh ba ia kito ki nongdie madan kiba la ioh laisen dei ban ailad ba kin shong die jingdie ha ka thain Khyndailad na ka bynta katto katne kynta (12:30 mynsngi haduh 2 baje nohphai sngi bad 7:30 mynmiet haduh 9 baje mynmiet), da kaba iasoi ruh ia ka jingiateh ba kim dei ban shong palat ia ka por ba la buh bad ban pynthud ia ka leit ka wan jong ki kali bad ki briew. Katba ia kito ki nongdie madan ki bym don laisen yn ym shah satia ba kin shong die jingdei ha kane ka jaka.

“U Special Officer ha ryngkat u General Secretary ka Association, ki bor ba dei khmih bad ki bor pulit kin peit bniah ba kine ki bym don laisen kim dei ban shong die ia kino kino ki mar ha kitei ki jaka. Lada ka don ka jingpynkhein, kumta u Special Officer ryngkat bad ki bor ba dei khmih bad ki pulit kim dei ban ailad ia kino kino ki nongdie ban die ia ki mar ki mata jong ki ha kine ki jaka,” da kaba bynrap, “U General Secretary ka Association uba shah kynthup lang ha ka Iingkashari u dei ban pynthikna ba ha ka por ba la pynkhreh ia ki jaka shong die jingdie da ki bor ba dei khmih ia kino kino ki nongdie madan, u dei ban phah kynriah noh mardor, bad lada um leh kumta yn hap ban kyndang mardor na ka jaka kaba u shong die jingdie.”

Ka Iingkashari ka la bthah ruh ba dei ban pynkynriah noh ia ki nongdie madan sha ki jaka kiba la pynkhreh da ki bor ba dei khmih, bad kiwei kiwei pat ki nongdie madan ki lah ban aplai ia ki laisen kiba thikna.

“Kiwei pat ki nongshong die madan ki long laitluid ba kin phah ia ki aplikeshon sha ki bor ba dei khmih ban ioh ia ka laisen kaba pura ia kaba ki bor ba dei khmih ki lah ban pdiang da kaba iaid katkum ki kyndon ain. Hadien ba la ioh ia ka kaiphod na ki bor ba dei khmih ha kaba iadei bad kitei ki aplikeshon, kane ka Iingkashari kan sa pyrkhat ban shim khia shuh shuh ha kaba iadei bad ki.”

Na ka liang u Special Officer un pynthikna halor ka jingpyntreikam kaba iaid beit iaid ryntih ia ka hukum jong ka Iingkashari bad ban aiti ia ka kaipod ha ka 5 tarik u Nailar 2025.