TSA: Iakhaid ka Pohskur Phlongingkhaw bad ka Mookyndur haka Super Division; jop ka Maskut haka 2nd Division

Syllad | The Rising MeghalayaAugust 21, 2025

Ka jingialehkai hapdeng ka Pohskur Phlongingkhaw pyrshah iaka Mookyndur kala kut da kaba iakhaid da 1-1 haka jingialehkai Super Division Football Tournament, katba ka Maskut kala jop da 1-0 pyrshah iaka Mukhla Wahshnong haka 2nd Division haka 21 tarik Nailar.

Baroh ar tylli kine ki lympung ialehkai la pyniaid da ka Thadlaskein Sports Association (TSA) ha madan Wahiajer Multi Sports Complex.

Haba phai sha ka jingiakhun Super Division, ka Phlongingkhaw kala tam shuwa shakhmat lyngba ka kol kaba la thep da u Seibor Nongrum (55), hynrei tang hadien katto katne por ka Mookyndur kala lah ha kaban tan biang iaka jingialehkai sha kaba iakhaid lyngba u Samehi Suting (61) u bym shym la pynlehnohei iaka kabu ksiar kaba ula ioh.

Ka jingialehkai haka 2nd Division, ka Iawpynsin Wahiajer kala iakhaid da 2-2 bad ka Iongshiwiat. Na kaliang ka Iongshiwiat la thep da u Tur Pale (12) bad Helpmi Dhar (37), katba iaki kol ka Iawpynsin Wahiajer la thep da u Lumlang Nongpluh (54) bad Marbait Nongpluh (69).

Shuwa kane ka jingialehkai, ka Maskut kala jop iaka Mukhla Wahshnong lyngba ka kol u Elias Nongspung (32).

Haka jingiakhun kaba long haka 20 tarik Nailar ka Lad Mukhla kala jop da 1-0 iaka Moodop, kawei pat ka jingialehkai hapdeng ka Laru pyrshah iaka Thadmusem kala kut da kaba iakhaid khlem don mano mano ba ioh pynkhih jar.

Ka jingialehkai ka ban wan, kata haka 22 tarik Nailar; haka 2nd Division ka Tympang SC ka ialehkai pyrshah iaka Pdienlum SC haka por 9.00 baje mynstep; ka Maya SC pyrshah iaka Mynkrem United haka por 12.00 baje mynsngi.

Haka Super Division pat ka ka Wahiajer SC kan iakhun pyrshah iaka Mukhla Raij haka por 1.00 baje nohphai sngi bad ka Heibor Iong-I FC pyrshah iaka Nongkhroh rim haka por 3.00 baje nohphai sngi.