Treilang ka tnad Food Safety, NCC bad ki nongshong iew ban pynkhuid iaki basa iew ha Iawmusiang

Syllad | The Rising MeghalayaAugust 21, 2025

Ka iew Iawmusiang, Jowai kaba dei ka iew kaba kham tnem ka jingia die ia thied kila sangeh shipor ban shong die jingdie na ka bynta ban pynlong ka jingpynkhuid paidbah iaki basa iew bapher bapher haka 20 tarik Nailar.

Ia kane ka jingpynkhuid iew la pynlong da ka jingskhimkhia tnad Commissionerate Food Safety hapoh ka jingkhmih ka Deputy Commissioner BDS Mukhim ryngkat ki NCC na ki khyndai tylli ki skul bad kolej ha Jowai kiba kynthup iaka Thomas Jones Synod College, Kiang Nangbah Government College, Tome Memorial Higher Secondary School, Jaintia Higher Secondary School, Jowai Public School, Skul Khimmusniang Presbyterian Secondary School, Little Flower Higher Secondary School bad ka KJP Synod Mihsngi Higher Secondary School ryngkat ki nonghikai. Ia ki NCC la ialam khmat u Havildar Sita Ram Pandey jong ka 42 Megh BN NCC Shillong.

Kane ka sienjam kala wanrah iaki committee iew, ki nongdie jingdie, ki trai dukan ha ryngkat ki 200 ngut ki NCC na ki 9 school bad college ban tylli na ka bynta ban pynlong iaka iew kaba khuid kaba suba.

Ha kane ka jingpynkhuid, la sakhi ba ki nongshong iew kila iasait khuid bha ia la ki jong ki dukan ki jong ki bad hadien pat ki sa ai rong ban pyniphuh iaki basa ki jong ki.

Iaki niut ki ner ba mih naka jingpynkhuid, ka Kong BDS Mukhim kala pyntip ba la shimti da ka Jowai Municipal Board ban bret iaki.

Shwa ka jingpynkhuid ka Kong BDS Mukhim haba ai jingkren sha ki paidbah kala khot iaka jingiatreilang na baroh ki bynta jong ka imlang sahlang ban pynneh pynsah ia ka jingkhuid jingsuba. Ka la ban jur ruh ba dei tang lyngba ka jingiatreilang na baroh, lah ban ioh ia ka imlang sahlang kaba khuid bad kaba koit ba khiah.

Ka Assistant Commissioner ka LBR Marak, MCS ruh kaba la ai jingkren haka jingialang kala ban jur ia ka jingdonkam jong ka jingkitkhlieh lang ha kaba pynneh ia ka jingkhuid jingsuba.

Ka Marak kala ong ba ka jingkhuid kam dei tang ban pynkhuid ia ki sawdong sawkun hynrei ka dei ruh ban tei ia ka imlang sahlang kaba don burom. Ka jingpynneh pynsah ia ka mariang kaba khuid, ka pynbha ia ka koit ka khiah bad ka jinglong jingman.

Kala kyntu ia baroh ban shim iaki rukom treikam kiba lah ban pynneh pynsah ha ka jingim ba man ka sngi. Ka la pynpaw ka jingsngewnguh ïaka sienjam jong ka tnad Food Safety bad ka la ai khublei ïa ka jingïashim bynta shitrhem jong ki cadet jong ka NCC, ki komiti ïew, ki nongdie dukan bad ki nongdie jingdie ha kane ka jingpynkhuid.