Trei ka Chad Sukra Jowai, pynkhuid ka JMB iaki ñiut ki ñier ha Iawmusiang

Syllad | The Rising MeghalayaApril 22, 2022

Shi sngi shuwa ka tamasa Chad Sukra jong ka Seinraij Jowai kaban long haka Sngi U Blei, ka Jowai Municpal Board (JMB) kala khyrwit ban trei borbah ban kynriah iaki ñiut ki ñier kiba la sahtah la shibnai tam ha Iawmusiang.

Kine ki ñiut ki nier ki dei kiba la sahkut mynta la shibnai tam, katta naduh Rymphang 4 tarik.

La sakhi ba ki trok dumper bad ki nongtrei ka JMB haka por shiteng synia haka sngi Palei bad mynta ka step Thohdieng kila pynkhuid ia kine ki ñiut da kaba pyndonkam da ka puh shilum ban khar iaki ñiut.

Bthah ka ïingbishar Meghalaya High Court ban kit ïaki ñiut ba lumthup ha Jowai

Ka khubor kaba iohlum ia kine ki ñiut yn bret sha ki krem dewiong kiba la iehshrah, bad ia ka jaka ym lah ban pynthikna.

Khublei!!! iaka Chad Sukra jong ka Seinraij Jowai kaba pynioh jingiarap shipor ban ioh ring pynhiar mynsiem da ka lyer khuid bad kaba lait na ka jingsma iwtung.

Kane ka jinglumthup ki ñiut kala pynthud shikatdei eh ia baroh u paidkar, ki kali motor bad khamtam eh iaki nongshong iew, ki nongdie dukan kiba shah ktah haduh ban da hap ban khang iaki dukan ha kine ki khyndiat sngi.

Ha kane ka Chad Sukra mynta ka kynti, u Myntri ka tnad Social Welfare Ma Kyrmen Shylla un long kum u kongsan haka Mynkoi Pyrdi. Loompyrdi Iongpiah bad haka por nohphaisngi pat haka prokram ha Iawmusiang u Chief Justice High Court Meghalaya, Justice Sanjib Banerjee un wan sakhi kum u kongsan.

Thet kti ka Sorkar Jylla ïaki ñiut ka Jowai, kynthup ka Meghalaya High Court iaka KSU Waheh Shnong Mupyut bad ki 6 shnong haka mukotduma

Kumban shu pynkynmaw halor kane ka jingsahkut ki ñiut ha iew ha Jowai, ka Synjuk Waheh Shnong Jowai kala mudui da ka jingujor PIL sha ka ïingbishar badon burom ka Meghalaya High Court pyrshah iaka Sorkar Jylla, Commissioner and Secretary ka tnad Urban Affairs ka Sorkar Jylla, Jaintia Hills Autonomous District Council, Jowai Municipal Board bad kiwei.

Ka iingbishar haka sien shong bishar ha une u bnai Iaiong 14 tarik kala pynmih iaka hukum bad bthah iaka Jowai Municipal Board bad ka Jaintia Hills Autonomous District Council ban kynriah iaki ñiut na ki iew ha Jowai bad ban pynthikna ban bret haka jaka ba dei ban bret.

Haka sngi Balang Bala dep (20 tarik) ka ïingbishar Meghalaya High Court haba shong bishar iaka Mukotduma PIL kala kynthup lang iaka KSU Moopyut Unit, u Waheh Shnong Moopyut bad hynriew tylli kiwei pat ki shong kum ki kynhun ha kane ka mukotduma.

Katkum ka hukum jong ka ïingbishar, ka Jowai Municipal Board kala ai da ka jingthoh bad pynpaw ba ha u bnai Lber 2021, ka kynhun sengbhalang haka kyrteng jong ka Khasi Students’ Union (KSU) Moopyut ryngkat bad ki hynriew shnong – Pynthor Langtein, Umsalang, Shhen Pyrsit, Moopyut Madan Tyrpait, Moosakhia bad Sohmynting – kila pyrshang ban khang iaka jaka bret ñiut Mynkjai.

Ka sorkar Jylla kumba ju long ha kiwei ki mukotduma, kala thet kti halor kane kam bret ñiut bad kala ong ba kam don bynta ha kaba iadei bad ka kam pyllang ñiut.

Ka iingbishar kala bthah iaka bor synshar District bad ka District Council ba kin shong pyrkhat ai jingmut ban weng mardor iaki jingeh khnang ba lah ban pyllang iaki niut na Jowai bad ban pynthikna ba kan nym don kano kano ka jingpang ba shyrkhei kaban wan lyngshop, khamtam kum ka jingpang water-borne diseases ki jingpang kiba iabit na ka um namar ba u slap ula wan ther jur ha kine ki sngi kiba la dep khlem sangeh.

Mynta ka sngi ruh ka iingbishar kan shong bishar biang ia kane ka mukotduma.