Thung ka HNLC da u Teimiki Laloo kum u vice chairman hadien ba iehnoh kam u Jyrwa

Syllad | The Rising MeghalayaSeptember 28, 2023

Ka seng Hynniewtrep National Liberation Council (HNLC) ha u kyrwoh lyngba u General Secretary-cum-Publicity Secretary u Bah Sainkupar Nongtraw ka pyntip ba u Vice Chairman jong ka Seng u Bah Sufiyan A Hazarika ba ju tip ruh kum u Manbhalang Jyrwa, ula iehnoh kam (resign) kum, kaba la pdiang ruh da central executive committee.

Ha kajuh ka por ka CEC (Central Executive Committee) ka la thung bujli ia u Bah Teimiki Laloo kum u vice chairman bathymmai jong ka seng na ka bynta hynriew bnai.

Ka HNLC ka la pdiang sngewbha ia ka jingiehnoh kam jong u Bah Manbhalang Jyrwa halor ka nongrim jong ka jingsngew para briew, bad ka HNLC ka la ong ruh ba kane ka jingiehnoh kam ka jong u kan ym don jingktah ne pyntroin ia ki rukom treikam bad ia ka nongrim jong ka seng. Nalor kata ka la ong ruh ba ki nongrim jong ka seng kin iai neh wat hapdeng ka jingkylla ia ki nongialam.

“Ngi kyrmen skhem ruh ba na ka liang ki nongshong shnong jong ka Bri u Hynniewtrep kan iai bteng ban kynmaw bad ruh ban niew burom ia u Bah Manbhalang Jyrwa u para briew” ong utei u nongialam ka HNLC

Nalor kata ka HNLC ka la ong ruh ba ka kyrmen skhem ba na ka liang ka sorkar kan kiar na kaba shim kabu bad pyndonkam bakla ia kane ka jingiehnoh kam jong u Bah Jyrwa hynrei ban pyniaid shakhmat ia ka lynti iakren iasuk.

Shuh shuh u la ong ruh ba ka jingpyniaid shakhmat ia ka jingiakren iasuk yn ialam noh da u vice chairman bathymmai jong ka Seng.