Thung baji ka trok shapoh synrang ha Ratacherra khlad u nongniah

Syllad | The Rising MeghalayaOctober 5, 2022

Uwei u nongñiah trok bar Jylla u bym pat lah ban tip kyrteng ula khlad hashen, katba u nongbud ula mynsaw jur hadien ba ka trok ka la thung baji shapoh synrang kaba jrong kumba duna 200 phut eiei.

Kane ka jingjia ka la jia haka surok National Highway 06 haka shnong Ratacherra, East Jaintia Hills District haka por kumba 12.30 baje eiei nohphai sngi haka sngi ba Ar.

Kane ka trok dei kaba don ïa u registration number TN-34-U-9034 kaba kit ïit bad thmu ban hiar sha Assam.

U nongbud jong kane ka trok la tip kyrteng kum u Murthu Simili 28 snem rta na ka Jylla Tamil Nadu.

Ki nongshong shnong, kiba la iohi iaka jingjja kila ïathuh ba kane ka trok haba ka la poi ha katei ka synrang ka la hap shapoh ka riat kaba jrong kumba duna 200 phut eiei.

U nongbud ula lait im hadien ba ula kynthih najrong ka trok bad pynkit ïa u sha PHC Umkiang hynrei namar ka jingmynsaw jur la pynkynriah ïa u sha Jowai Civil Hospital, Ïalong, la iathuh ki nongshong shnong.

Ki nongshong shnong kiba la ïohi ïa kane ka jingjia ryngkat ki pulit ki la ïarap ban sei ïaka met ïap jong une u nongñiah bad la pynkit sha Khliehriat CHC ban pyndep ïaki jingdonkam jong ka aiñ.