Thet kti ka Sorkar Jylla ïaki ñiut ka Jowai, kynthup ka Meghalaya High Court iaka KSU Waheh Shnong Mupyut bad ki 6 shnong haka mukotduma

Syllad | The Rising MeghalayaApril 20, 2022

Ka ïingbishar Meghalaya High Court haba shong bishar iaka Mukotduma PIL kaba la ujor da ka Synjuk Waheh Shnong Jowai haka sngi Balang halor ka jingsahkut ki ñiut ha Iawmusiang bad Iawthymme kala kynthup lang iaka KSU Moopyut Unit, u Waheh Shnong Moopyut bad hynriew tylli kiwei pat ki shong kum ki kynhun ha kane ka mukotduma.

Katkum ka hukum jong ka ïingbishar, ka Jowai Municipal Board kala ai da ka jingthoh bad pynpaw ba ha u bnai Lber 2021, ka kynhun sengbhalang haka kyrteng jong ka Khasi Students’ Union (KSU) Moopyut ryngkat bad ki hynriew shnong – Pynthor Langtein, Umsalang, Shhen Pyrsit, Moopyut Madan Tyrpait, Moosakhia bad Sohmynting – kila pyrshang ban khang iaka jaka bret ñiut Mynkjai.

Ka JMB kala ong wat hadien bala don ka jingiakut ban bret ñiut shipor, katta 3 bnai, pynban namar bym shym la ioh iaka jaka bret ñiut kaba la bynshet haka task force kaba la thaw da tnad Urban Affairs Department ryngkat bad ka Jowai Municipal Board, ka jingpyllang iaki niut ha Jowai la hap ban sangeh noh.

Shuh shuh ka sorkar Jylla kumba ju long ha kiwei ki mukotduma, kala thet kti halor kane kam bret ñiut bad kala ong ba kam don bynta ha kaba iadei bad ka kam pyllang ñiut.

Ka ïingbishar ka ong ba jinglum thup ki ñiut ka long kaei kaei kaba pynthud bad kaba lah ban wanrah jingma ia kane ka sor kaba paw ha Jylla, kaba lah ban wanrah iaka jingpang bad ka jingjia ba sngewsih bad ka State administration kala lehsting ia kane ka kam.

Ka iingbishar kala kynthup Khasi Students’ Union, Moopyut, Waheh Shnong Moopyut ha ryngkat kiwei ki hynriew shnong kum ki kynhun ha kane ka mukotduma.

Ka Jaintia Hills Autonomous District Council kala kam ba kam pat ioh iaka kopi jong kane ka ujor bad ia kane kopi yn sa phah ha u muktiar ba mihkhmat iaka Council.

Ka district council kan hap ban jubab bad kumjuh yn phah iaka jingujor sha ki kynhun kaba la kynthup lang ha kane ka mukotduma.

Ka iingbishar kan shong bishar biang ia kane ka mukotduma haka 22 tarik u Iaiong 2022.

Ka iingbishar kala bthah iaka sorkar bad ka District Council ba kin shong pyrkhat ai jingmut ban weng mardor iaki jingeh khnang ba lah ban pyllang iaki niut na Jowai bad ban pynthikna ba kan nym don kano kano ka jingpang ba shyrkhei kaban wan lyngshop, khamtam kum ka jingpang water-borne diseases ki jingpang kiba iabit na ka um namar ba u slap ula wan ther jur ha kine ki sngi kiba la dep khlem sangeh.