Ther u Myntri ia ki national media ba kynthoh khlem nongrim halor ka jingjah ki shi kurim na Indore

Syllad | The Rising MeghalayaJune 6, 2025

U Myntri ka Tnad Tourism u Bah Paul Lyngdoh haka 5 tarik Jylliew u la ong ba ki jingleh jong ki national media ka pyni ba kim tip bha shaphang ka Meghalaya bad ka jingkwah ban shu pyndbunam sniew ia ka jylla bad ia ki nongshong shnong jong ka.

Haba pynrem jur ia ka rukom ai khubor ka bym shisha da ki national media halor ka jingjia jah rngai jong ki shi kurim na Indore, u Bah Paul u la ong ba ki national media barabor ki ju pynpaw ia ki jingleh shiliang pyshah ia ka thain Shatei Lammihngi jong ka ri bad ki iohi ia ka jingkiew jong ka Meghalaya ha ki kam jngohkai kum ka jingma.

“Kumta ia kaba kum kane ka rukom leh dei ban pynrem jur bad ka dei kaei kaei kaba sngewkhia shibun,” u la ong da kaba bynrap ba ka jingshah pyniap ba dang shen jong u nong Indore u Raja Raghuvanshi ka dei ka jingjia kaba jia ryngkhat shisien lano.

“Ha ka jingshisha ngim pat lah ban tip ia ki jingshisha ia kaei kaba la jia tad haduh ban da pyndep ia ka jingtohkit baroh, kumta ym pat lah ban ong ei ei halor kane ka phang. Kumta, nga pynrem jur ia kane ka jingleh ki national media. Ka pyni ia ka jingleh shiliang ka jong ki pyrshah ia ka thain ka jong ngi bad khamtam namar ka jingkiew jong ka kam jngohkai ha Meghalaya ki iohi ba ka long ka jingma,” u la ong.

“Hynrei, shah ngan pynkynmaw ia ki bad ia ki nongshong shnong ka Meghalaya ba ka kam jngohkai ha ka thain Sohra ka dei kaba la iaid mynta lah da ki bun phewtylli ki snem bad kam pat don kano kano ka dak sniew ha ka. Kam pat shym la don satia kano kano ka rekod kaba iadei bad ki jingjia jong ka jingiaumsnam ha ki snem kiba la leit noh, bad ngi la don ia ki mishoneri kiba nyngkong eh kiba la wan poi ha Sohra naduh u snem 1841, ngi don ia ka Ram Krishna Mission kaba don ia ki tnad kiba bun tam ha ka jylla bad kaba don ia ka headquarter ha Sohra. Kumta kane ka jingleh ka pynpaw ia ka jingduna ia ka jingtip bad jingsngewthuh ia ka Meghalaya bad ka jingthmu ban shu pynthohbria ia ka jylla bad ki nongshong shnong jong ka,” bynrap u Myntri.