Ther u Dy CM ia ka sorkar US ba kynnoh bym don jingshngain ia ki touirst ha Meghalaya bad NE

Syllad | The Rising MeghalayaJune 23, 2025

U Symbud Myntri Rangbah ka Jylla uba khmih ia ka Tnad kam Pohiing (Police), u Bah Prestone Tynsong haka sngi Nyngkong u la ther tyngeh ia ka sorkar United States of America (USA) halor ka jingkynnoh ba ka jylla Meghalaya bad ka thain Shatei Lammihngi ka Ri India (Northeast) ki dei ki bym shngain na ka bynta ki nongwan shangkai pyrthei.

Ka sorkar US dang shen ka la pynmih ia ka jingbthah kaba kyntu ia ki nongshong shnong jong ka ba kim dei ban leit shangkai sha Meghalaya bad kiwei ki jylla ka thain Shatei Lammihngi jong ka Ri India namar ki dei ki jaka kiba don jingma shibun.

“Ka long kaba sngewsih shibun ba ka sorkar US kan pynmih ia kaba kum kane ka jingbthah. Ngam tip nangno kane ka khubor ka wan bad nangno ki ioh ia kane ka khubor,” ong u Bah Prestone haba kren sha ki lad pathai khubor.

U Bah Prestone u pynshai ruh ba ka Meghalaya ka dei ka jaka kaba shngain tam ha ka pyrthei.

“Ia kane la sakhi ym tang ma ngi na Meghalaya hynrei na kylleng ka ri India bad ym tang na India hynrei wat na kylleng satlak ka pyrthei ki la sakhi ia kane ba ka Meghalaya ha ka jingshisha ka dei ka jaka kaba shngain tam ban wan shngaikai bad ban pynlut ia ka por shuti,” u la bynrap.