Ther u Bah Paul ia ki nongialam ka MGSPHSVA, ka jingtur sha Secretariat ka dei ka jingpynkhein ain

Syllad | The Rising MeghalayaJuly 1, 2025

U Nongaiktien ka Sorkar MDA uba dei ruh u Myntri Sorkar u Bah Paul Lyngdoh haka sngi ba Ar u la ther tyngeh ia ki nongialam jong ka Meghalaya and Greater Shillong Progressive Hawkers and Street Vendors Association (MGSPHSVA) da kaba ong ka don kaei kaei ka jingthmu kaba sha lyndet ban pynslem ha kaba iadei bad ka jingpynkynriah ia ki nongdie madan sha ka bynta ba shalor jong ka MUDA Parking lot.

Ia kane u Bah Paul u la pynpaw kum ka jubab halor ki jingiakhih ba la pynlong da ka MGSPHSVA ia kaba ki la kynnoh ba ka dei ka jingkyndang kaba beain pyrshah ia ki nongshong die madan hapoh Khyndailad, Police Bazar.

“Kumta, la iohi kumba ka don kaei kaei ka jingthmu kaba sha lyndet da ki katto katne ki nongialam. Ngan ym kynnoh ia baroh ki nongdie madan hynrei ia ki katto katne ki nongialam ki ban ym kwah ban pynbeit ia kane ka kam. Hynrei sa shisien pat shah ngan pynkynmaw biang hangne ba ka sorkar ka kut jingmut skhem ban pynthikna ia ka jingsynshar jong ka ain,” ong u Bah Paul haba kren sha ki lad pathai khubor.

U la maham ruh ba ka sorkar kan ym ailad ba ka jingsynshar jong ka ain kan shah iuhroit, da kaba kdew halor ka jingleit tur jong ki nongdie madan hakhmat Secretariat ia kaba u la kam ba ka dei ka jingpynkhein ia ka kyndon 163 jong ka BNS.

U Bah Paul u la ong ba ka sorkar ka la pynjem da kaba pynjlan ia ka por ban pynkynriah ia ki nongshong madan shaduh ka 22 tarik Naitung bad tyrwa ruh ia ki jingkyrshan sha kito kiba mynjur ban kynriah sha katei ka jaka ba la pynkhreh.

“Ka sorkar ka la mang kyrpang ia ka jingkyrshan pisa kaba T.10,000 na ka bynta uwei/kawei ki nongdie madan kum ka bai pynkynriah bad ban ai ruh ia ka jingkyrshan kaba T.2000 man u bnai na ka bynta san bnai kynthih ban iarap ban pynshlur ia ki ban kynriah sha ka jaka shong kaba thymmai,” ong u Bah Paul.

Tur paidbah ki nongdie madan sha Secretariat hapdeng ka jingpynkhlain bor pahara, dawa jingialang kyrkieh ka PTVC

Nalor kata u la ban jur ruh ba ka sorkar ka don ha ka lynti kaba dei bad ka la shimkhia da ka jingkitkhlieh ha ki rukom treikam jong ka ban pynduna ia ka jingkhapngiah ha ka nongbah Shillong bad ban pynlong lynti iaid kjat ha ki katto katne ki jaka.

U la kdew ruh ia ka jingdonkam jong ka hok kaba mar ryngkat na ka bynta baroh ki nongpyndonkam ia ki surok, kata kynthup ia ki kali, ki paidbah bad ki nongdie jingdie bad ban jur ba ka sorkar kan ym kyntait ia ki hok jong kawei na kine.

“Nga la ju pynkynmaw ialade ban ong ba baroh ki nongpyndonkam ia ka surok ki don ia ka hok kaba mar ryngkat bad ka hok jong nga kum u nongdie madan kam mut ba kan kyntait noh ia ka hok jong kiwei pat kiba pyndonkam ia ka surok. Ngi don ruh ia ki nongniah kali kiba dei ki nongpyndonkam ia ka surok. Ngi don ia ki paidbah nongleit nongwan kiba dei ruh ki nongpyndonkam. Ngim lah ban kyntait ia ki hok jong ki ba kin pyndonkam ia kajuh ka jaka tang na ka bynta ka jingmyntoi jong ki katto katne ki nongpyndonkam ia ka surok,” bynrap u Bah Paul.

Ha kaba iadei bad ka jingleit kyndang ia ki nongdie madan, u Bah Paul u la ong ba kalong kaba sngewsih bad ba ki ophisar ki la kren shai ba yn shah tang ia kito kiba don ia ki syrnot Vending (CoV) ba kin pyniaid ia ki kam khaii jong ki.