Ther u Bah Paul ia ka VPP ha KHADC ba kam ba ki duna ka jingshemphang namar ki dang thymmai

Syllad | The Rising MeghalayaJune 27, 2025

U Nongialam ka UDP uba dei ruh u Myntri Sorkar, u Bah Paul Lyngdoh haka 27 tarik Jylliew u la ther tyngeh ia ka jingkam jong ka Executive Committee (EC) ka Voice of the People Party (VPP) ha Khasi Hills Autonomous District Council (KHADC) ba ki dang duna ka jingshemphang namar ba ki dang dei kiba thymmai da kaba ong ba kane ka pyni ia ka jingbym long ba la pynkhreh bad ka jingbym shemphang ha ki rukom treikam.

“Ym don mano mano ruh kiba lah ban kam ba ki dang duna ka jingshemphang namar ba ki dang thymmai,” ong u Bah Paul. “La jied ia phi da u paidbah, phim lah shuh ban kam ba phi dang shu sdang bad ba phim pat shemphang, kata kadei ka bym lah ban pdiang. Phi la rung ha ka kam ha kaba la khmih lynti ia phi ba phin ialam, la khmih lynti ia phi ba phi dei ban tip ia kyndon, ki ain ki kanun bad ki Act bapher bapher jong ka Council,” u la ong.

Kane ka jingpynpaw jong u Bah Paul ka la wan long ruh hadien ba ka EC ka VPP ha KHADC ka la pdiang ba ka la iakynduh ia shibun ki jingeh namar ka jingbym don ia ka jingshemphang lyngba u EM in-charge Finance jong ka, u Bah Seiborlang Warbah haba jubab halor ka jingiatai ia ka Mang tyngka ha ka Dorbar Lyiur kaba dang shu kut jong ka Council.

U Bah Paul u la ban jur ba ka dei ka kamram jong baroh ki MDC ba la shah jied ba la kumno kumno ban pule ia ka Sixth Schedule, ki kyndon bapher pher, ki ain bad ki rule. U la pynpaw ruh ka jinglyngngoh ba ka jingjia ba rit ba ria ka hap ban poi shaduh ka Iingkashari High Court, ha kaba ka iingkashari ka la buh jingkylli ia ka jingpyntreikam ia ki hukum ki bym don ha ka ain.

U Myntri u la kdew ia ki artylli ki mat kiba dang shen kiba la poi sha ka Iingkashari High Court, kaba kynthup ia ka jingshah weng kam jong ki katto katne ngut ki nongtrei bad ka jingpynieng khyrdop lum khajna ha ka surok bah National Highway. “Shisien ba phi la don ia ka Toll Road, kumta katei ka surok ka dei kaba la tei bad bei tyngka da ka NHAI ba kan ialeh pat ban khyllie ia ka jingbei tyngka da kaba buh ia ki Toll Gate. Hynrei, mynta ka bor aiu ha ka pyrthei ka ban shah ia kawei pat ka kynhun ban lum khajna na ka surok kaba ka la bei tyngka bad ia kaba nga ngeit ba kan dang pynmih ia ka jinglut jingsep kaba ka la bei. Kine ki dei ki mat kiba kongsan bad ki bym da donkam shibun ka jingshemphang hynrei tang ki jingsngewthuh ba malu mala,” u la bynrap.

Haba kylli la kane ka EC ba mynta ka dei ban hiar shuki namar ka jingbym lah treikam, u Bah Paul u la ong, “Lada phi kren ia ka jingbym pat shemphang, u president ka VPP u la don ha ka Iingdorbar ka Jylla, u la long u president ka HSPDP, u la long u nongialam ba hakhmat jong ka UDP, te kumno phi kren ia kata ka jingbym don jingshemphang.”

Nalor kata u la pynrem jur ruh ia ka jingleh jong kane ka seng ha kaba jied ia ki nongmihkhmat da kaba ong, “Phi jied ia ki briew na ki Dhaba ne ki jaka bam bad na rud surok bad leit bret pat ia ki hapoh Council. Kane ka dei ka jingniew bein ia ki paidbah nongjied.