Ther tyngeh u Myntri ia ki national media ba kynthoh ia ka Meghalaya kum ka jylla ki kam bymman

Syllad | The Rising MeghalayaMay 30, 2025

U Myntri ka Tnad Tourism u Bah Paul Lyngdoh haka sngi Thohdieng u la ther tyngeh ia ki national media ne ki lad pathai khubor ka ri halor ka jingkynnoh ia ka Meghalaya kum ka jylla kaba jylla kaba jur bha ki kam bymman da kaba ong ba kin sa rah ia kane ka mat ha ki kyrdan kiba dei ban iakren.

Kane ka la wan long shi sngi hadien ba kawei na ki lad pathai khubor ka ri ka la shim ia ka Meghalaya kum ka jylla kaba jur ki kam bymman haba pathai ia ka khubor kaba iadei bad ka jingjah rngai jong ki arngut ki shikurim ki nongwan shangkai pyrthei na Indore, Madhya Pradesh ha ka por ba ki dang leit shangkai sha ka thain Sohra kaba dei ka jaka jngohkai kaba pawkhmat.

“Kawei ka lad pathai khubor jong ka ri ka la kynthoh ia ka Meghalaya kum ka jylla kaba jur ki kam bymman, hynrei ngim sngew phylla namar ki don ki lad pathai khubor ka ri kiba long pyrshah bad kiba peit shiliang ia ka thain Shatei Lammihngi, hynrei ngin shim ia kane ka kam ha ka kyrdan kaba dei,” ong u Bah Paul haba kren sha ki lad pathai khubor.

U la ong ruh, “Hynnin ka sngi katba nga dang don ha kawei ka prokram kaba iadei bad ka jingiakop parasailing ha kine ki san sngi ba la dep, baroh ki riew pawkhmat kiba la wan iashim bynta ki dei na ki bynta bapher bapher jong ka ri ha kaba ki la pynpaw ba kim pat pat ju iohi ia ka jylla kaba don ia ka jingkitkhlieh bad kaba khuid bad kaba suk ba sain kum ka Meghalaya.

Kumta u la ong ba kane ka jingkynthoh jong katei ka lad pathai khubor ka long kaba sngew bynniaw shibun bad kaba pynpaw ia kata ka jingsngew shiliang pyrshah ia ngi,” u la bynrap.