Ther tyngeh u MP ia ka NGT halor ka jingkynnoh leh arsap, byrthen ban rah ha parliament

Syllad | The Rising MeghalayaMay 27, 2025

U MP ba marwei ka Rajya Sabha ka Jylla u Dr WR Kharlukhi haka sngi Nyngkong u la ther tyngeh ia ka National Green Tribunal (NGT) halor ka jingkynnoh leh arsap bad ong ba un sa rah ia kane ka mat ban iakren hapoh ka iingdorbar Parliament.

U Dr Kharlukhi uba dei ruh u president barim ka National People’s Party (NPP) ka Jylla u la kynnoh ba ka NGT ka la pulom ban leh ei ei halor ki khubor kiba iadei bad ka jingiap jong ki briew na ki jingpang kiba mih na ka jingjaboh ka lyer ba la pynmih da ki karkhana, hynrei ka pynkloi ban shimkhia tang ha kaba iadei bad ka jingpynjaboh ia ka mariang.

“Ngan sa wanrah da ka zero hour notice hapoh parliament. Hooid, ka NGT ka pyrshah bha halor ka kam tih dewiong beain ha ka jylla, ki la ialeh pyrshah ia ki briew jong ngi bad ka la ktah jur bha ia ki nongtih dewiong kiba rit ba ria. Hynrei, kaei kaba pynkyndit ia nga ka long halor ka khubor kaba mih ha ka ‘The Hindu’ kaba ong ba da ki million ngut ki briew ki iap namar ka jingpynmih ia ka lyer jabo da ki karkhana. Aiu ka NGT ka la leh halor kane, bun ki metro ki la shah ktah jur namar kane.? Ngan sa rah ban iakren ia kane ka mat hapoh Parliament, namar kane ha nga hi ka dei ka jingtreikam kaba arsap,” ong u MP haba kren sha ki lad pathai khubor.

“Ki briew jong ngi ki la shah ktah jur na ka jingkhang tih dewiong jong ka NGT naduh u snem 2014 khamtam namar ka kam tih dewiong ka dei ka lad kamai jakpoh mynta lah palat sawphew snem, hynrei kynsan la shu khangdam noh,” u la ong da kaba bynrap, ym tang ba ka la ktah ia ka kamai kajih jong ki hajar ngut ki briew hynrei ka la ktah jur ruh ia ka jingioh lum khajna jong ka jylla bad ki Autonomoous District Council (ADC).

“Kaei kaba pynlyngngoh ia nga ka long balei ba ka NGT kam shym la leh ei ei pyrshah ia ki karkhana, kiba la paw shai ha ka ‘The Hindu’ ba da ki million ngut ki briew ki la iap na ki jingpang kiba mih na ka jingjaboh ba la pynmih da ki karkhana,” u la bynrap.

Haba kylli, une u MP u la ong, “Phi iohi ba ki ong ba ka jingtih dewiong thliew khnai (rat hole mining) ka ktah ia ka mariang, hynrei ka jingpynjaboh ba la pynmih da ki karkhana ka la ktah ia ka jingim briew. Kumta, hato ka jingim briew kam long kaba kongsan? Nga sngw ba ka jingim ki briew ka dei kaba kongsan kum ka mariang, hynrei kaei kaba nga mut ban ong ka long ba ki dei ban wad bniah balei ba ka jingtih dewiong ka ktah ia ki wah?

U la bteng ruh da kaba ong ba ha ka jingsngew ka jong u, ki wah ki kylla jakhlia namar ka jingpynhap dewiong ym dei na ka jingtih dewiong. U la ban jur ruh halor ka jingdonkam ban don ka jaka kaba biang ban pynhap ia u dewiong khnang ban pynthikna ba ka um acid na u dewiong kan ym ioh lad ban tuid sha ki wah.