Ther tyngeh ka KHADC ia ka bor District ba khang ia ka khyrdop lum khajna ha Umdihar

Syllad | The Rising MeghalayaMay 21, 2025

Ka Khasi Hills Autonomous District Council (KHADC) haka 20 tarik Jymmang ka la ther tyngeh ia ka bor District ka Ri Bhoi namar ka jingkhang ia ka khyrdop lum khajna jong ka ha ka shnong Umdihar khlem da ai ia kano kano ka jingpyntip.

Haba shim ia kane ka jingleh kum ka jingibein, u nongaiktien ka EC ba la ialam da ka VPP u Bah Powell Sohkhlet u la ong, “Ngi don ia ki khyrdop lum khajna ha kylleng ki District kiba hap hapoh u pud u sam jong ka Council, bad kine kim ju mad satia ia kano kano ka jingeh ha ki snem kiba la leit noh. Hynrei, tang mynta namar ba ka VPP ka la shimti ia ka EC ha KHADC, kane ka jingjia ka la wan jia.”

“Kane ka pyni ruh ia ka jingshisha ba ka bor District ki la niew ia ka KHADC kum ki sengbhalang lane ki runar kiba lum pisa beain,” u la ong da kaba bynrap, “Ngi sngew lyngngoh namar ha ka por ba ngi pyntreikam ia ka khyrdop (hadien ba la pynthymmai) la khang noh mardor. Nga suba jur ba ka don kaei kaei sha lyndet jong kane ka jingleh da ka bor District,” u la ong.

Nalor kata u Bah Powell u la ong ruh, “Ngim itynnad satia ia ka jingleh jong u Magistrate uba don ha ka kam. Ka dei ka bym lah ban pdiang namar kum ka EC ba la jied da u paidbah, ngim shym la pyniaid ia ka kynhun sengbhalang lane ka kynhun runar hangne. Ka long kaba sngewsih ban ong ba i kumba ki bor District ki niew ia ngi kum ki nongpynkhein ain. Kumta nga pynrem jur ia kane ka jingleh jong ki bor District.”

Katkum ka jingpynpaw ka jong u, ka jinglum khajna da ka KHADC ka dei katkum ki kyndon jong ka Sixth Schedule jong ka Riti Synshar jong ka Ri India.

Kane ka khyrdop lum khajna ka KHADC ha Umdihar ka la shah khang noh ha ka 16 tarik Jymmang, kata tang shi sngi hadien ba la sdang pyntreikam ia ka.

Na ka liang u Executive Member uba khmih ia ka Trade, u Bah Winston Tony Lyngdoh u la ong ba kane ka khyrdop ba la ai wai sha u Pyndaplang Diengdoh ka dei kawei napdeng ki 11 tylli ki khyrdop ba la pynieng da ka KHADC ha kylleng ki District mynta la bun bun snem.

“Kane ka khyrdop kam dei kaba beain. Ngi la ai ia ka work order katkum ka lynti hadien ba u nongshim wai u la ioh ia ka No objection Certificate (NOC) na ka Dorbar Shnong, ha kaba ia ka copy la phah sha u Deputy Commissioner ka Ri Bhoi bad sha u Superintendent of Police (SP) ki bym shym la pyrshah, hynrei kiba la phah pynban da ki bor pulit ban pahara ha ka 15 tarik Jymmang hadien ba kane ka khyrdop ka la sdang ban treikam. La ai ia ki receipt kiba biang na ka bynta man la ki jinglum,” u la ong.

“Kat haduh mynta, nga dang ap ia ka jingthoh na ki bor District ka Ri Bhoi hashwa ba ngin shim ia ka rai halor kane ka phang. Lada ki bor District ki pyrkhat ba kane ka khyrdop ka long kaba beain, thoh sha ngi namar ngi don hangne ym ban pynkhein ia ka ain,” bynrap u Bah Winston.

U EM u pyntip ruh ba napdeng ki 11 tylli ki khyrdop lum khajna, tang 7-8 tylli ki treikam.Ia ki laitylli ki khyrdop la khang hadien ka jingioh jingujor na ki paidbah. Ngi la phah ia ki briew jong ngi ban juirp ia kiwei pat ki khyrdop bad ngin sa rai la ki dang long ne em ban treikam,” u la ong da kaba bynrap ba ka Council ka long kaba kloi ban iatreilang bad ka sorkar.

Kumjuh ruh u Bah Winston u la pynpaw ruh ba um lah ban pynshai la ka KHADC ka la thoh ne em sha ka Ministry of Home Affairs (MHA) ban pan jingbit na ka bynta ban buh ia ki khyrdop, da kaba bynrap, “Hynrei ngi la bud ia baroh ki kyndon katkum ka ain. Ki khyrdop lum khajna ka KHADC ki dei kiba la don mynta la bun bun snem.”

Haba bynrap ia kane, u Bah Sohkhlet u la ong ba ka KHADC ka la shu pynthymmai ia ki work order na ka bynta ban ai wai ia ki khyrdop.

“Lada ka don kaba kum kata (ba ngi donkam jingbit na ka MHA), ka sorkar Jylla ka la dei ban pyntip sha ka District Council. Hynrei katkum ka rekod jong ngi, kam pat don kum kata ka jingpyntip ba la ioh na ka sorkar Jylla. Kumta, ngi shim ba baroh kine ki khyrdop ki dei kiba shong ain bad ngin bteng ban pyntreikam ia ki kumba la leh da ki EC barim,” u la ong.