Ther ka KSU iaka sorkar haka jingrakhe lyngkhuh sngi iap U Tirot Sing: “Pyntreikam iaki ain ym ban khap ribbon”

Syllad | The Rising MeghalayaJuly 17, 2025

Haba shim bynta ha ka jingrakhe ia ka lyngkhuh sngi iap ba 190 jong u Syiem Tirot Sing, ka Khasi Students’ Union (KSU) ka la dawa na ka Sorkar Jylla bad na ki briew kiba don ha ka bor ba kin buh hakhmat eh ban pyntreikam ia ki ain kiba biang ban iada ia ka khyndew ka shyiap bad ia ki briew jong ka ha ka jaka ban shu khap ribon ha ki jingialang.

Ka KSU ka la ther tyngeh ruh ia ki nongthaw ain na ka liang synshar bad liang pyrshah halor ka jingpynlut por tang ha ki jingkynnoh markylliang ha ka jaka ban iakren bad pyntreikam ia ki ain ki ban pynmyntoi ia ki paidbah.

“Ka Sorkar Jylla bad ki briew kiba don ha ka bor kim dei ban pynlut por tang ha kaba khap ribon, hynrei ban pyntreikam ia ki ain kiba biang ban iada ia ki trai ri trai muluk bad ia ka khyndew ka shyiap jong ki,” ong u president ka KSU u Samla Lambokstarwell Marngar haba kren ha ka jingialang ba la pynlong hakhmat u dur mot u Tirot Sing Syiem ha ka nongbah Shillong haka 17 tarik Naitung.

“Ki paidbah ki la phah ia ki nongmihkhmat sha Secretariat/Assembly ban thaw ain na ka bynta ban pynthikna ia ki kam shong shngain bad ka jingshngain jong ka khyndew ka shyiap  bad ki briew jong ngi, hynrei kine ki nongthaw ain na ka liang synshar bad liang pyrshah la iohi ba ki la pynlut ia ka por tang ha ki jingkynnoh bad kynthoh markylliang ha ka jaka ban pynlut por ha kaba iamir jingmut bad ban wanrah ia ki ain kiba kongsan ki ban iada ia ka khyndew ka shyiap bad ki briew jong ngi,” u la ong.

U samla Lambokstar u la ong ba ka KSU ka la rah ia shibun ki mat kiba iadei bad ka jingshngain jong ki trai ri trai muluk. U pynkynmaw ba kiba bun ki samla ki la shah kem ha u snem 2013 ha ka por ba iakhih na ka bynta ban dawa pyntreikam ia ka Inner Line Permit (ILP), bad bynrap ba ka jingbym don ia ka mon sain pyrthei na ka liang ka sorkar ka la pynbor ia ki paidbah ba kin mih sha surok ban pynjur ia ki jingdawa jong ki.

Une u nongialam ka KSU u khot ruh ia ki samla ba kin shim ia ka jingkitkhlieh na ka bynta  ka bit ka biang bad ka jingshngain jong ka ri da kaba ban jur ruh ba kim dei ban shaniah tylli ha ki nongmihkhmat ba la jied.

“Nga kwah ban ong ba katba ngi dang ring mynsiem ngim dei ban duh jingkyrmen, ngim dei ban shaniah ha kine ki MLA kontrak kiba shong hapoh Secretariat, hynrei ngi donkam ban ieng skhem ha la ka nongrim ban iada ia la ka jong ka khyndew ka shyiap bad ia ki briew jong ngi,” u la ong.

Nalor kata u la pynpaw ruh ka jingsngewkhia jur halor ka jingthmu wanrah lynti rel da kaba kynnoh ba kito kiba donkti ki buh hakhmat ia ki jingmyntoi shimet ban ia ka bha ka miat jong ki nongshong shnong ka Jylla.

“Haba ngi pyrshang ban wad bniah ia ka daw ha lyndet jong kane ka jingthmu ban wanrah lynti rel ha Rilum Khasi Jaintia, ngi shem ba ka jingthmu jong ki kam dei ban pynmyntoi ia ki paidbah hynrei na ka bynta ialade shimet,” ong u nongialam ka KSU haba kyntu ia ki paidbah ba kim dei ban shu long tang ki nongpeitkai hyrnei ban buh ka jingkitkhlieh ha kito ki briew kiba don ha ka bor halor ki jingleh jong ki.         

U la kyntu ruh ia ki nongshong shnong ba kin long kiba husiar bad ban ithuh ia ki bor kiba na bar kiba pyrshang ban pynjot pynpra ia ka imlang sahlang jong ki, kata da kaba leh mynleh ialade kum ki nongsngewlem.

U samla Lambokstar u la pynpaw ruh halor ka jingdonkam ban weng ia ki jingeh ha ka imlang sahlang, kum ka jingma na u drok bad ka jingkiew ki kam tuh kam thiem khamtam ha ka nongbah Shillong, da kaba buh jingkylli balei ba kine ki jingeh ki ktah ia ka imlang sahlang watla ki don ia ka kolshor jong ka burom ka akor.

Katba u Chairman ka North East Student Organizations (NESO) u Bah Samuel Jyrwa ha ka jingkren ula pynpaw halor ka jingialeh kaba dang iai bteng jong ka jaidbynriew Khasi na ka bynta la ka jong ka khyndew ka shyiap bad ki hok jong ki.

U la buh ruh ka jingkylli la ki nongshong shnong ki la ioh shisha ia kata ka jingsngew shngain bad ka jinglaitluid wat hadien 54 snem ka jingioh ia la ka jong ka jylla bad 78 snem ka jinglaitluid jong ka ri India.

U bah Jyrwa u la kyntu ia ki samla ba kin shim ia ka jingkitkhlieh ban peit ia ka bit ka biang jong ki pateng ban wan. U la ban jur ia ka jingdonkam jong ki samla ban ieng bad ialeh ban long kynrad ha la ka jong ka khyndew ka shyiap bad ban lait na ki jingeh kiban sa wan.