Ther ka JNC iaki MLA Jaintia ba thmu wanrah lynti rel

Syllad | The Rising MeghalayaDecember 30, 2023

Ka Jaintia National Council (JNC) kala ther tyngeh iaki MLA na Rilum Jaintia halor ka jingthmu ban wanrah lynti rel ha East Jaintia Hills District.

U president ka seng JNC u Sambormi Lyngdoh ula kynnoh ba ki MLA na Rilum Jaintia ki don iaka jingthmu ban wanrah jubor iaka lynti rel ha East Jaintia Hills District, wat hadien ba ki paidbah ki pyrshah iaka project rel ka sorkar.

Ia kane ula ong haba kren haka jingkynmaw burom iaka lyngkhuh sngi iap ba 161 snem u Kiang Nangbah u khlawait bad u nongialeh pyrshah iaka sorkar bilat haka 30 tarik Nohprah.

Ula ong ba ia mynta hi ka East Jaiñtia Hills kam pat donkam satia ban wanrah ia kata ka lynti rel, hynrei ka jingdawa kaba hakhmat eh ka long ban wanrah shwa iaka roi ka par kynthup naduh ka surok, ki kolej sorkar bad kiwei kiwei ki kam pynroi hapoh ka District.

Ka JNC ha kane ka sngi kala buh syntiew ha u mot dur sahnam u Kiang Nangbah uba don hakhmat ka ophis u Deputy Commissioner ha Khliehriat.