Ther ka Dorbar Shnong Khimusniang ia ka JSU ba tuklar ia ki kam shnong

Syllad | The Rising MeghalayaMay 30, 2025

Ka Dorbar Shnong Khimusniang kala ther tyngeh iaka Jaintia Students’ Union (JSU) kaba wan ban tuklar iaki ki kam jong ka shnong khlem da ioh jingbit lane iaid lyngba na ka Dorbar Shnong.

U Waheh Shnong ka Khimusniang, Ma Titos Bamon, haba kren sha ki lad pathai khubor haka 29 tarik Jymmang ula ther iaka seng Jaintia Students’ Union (JSU) Jowai Circle halor ka jingpynshai jong ka seng ha kaba ïadei bad ka surok na Urkhla sha ka Treatment Plant jong ka tnad PHE kaba don hapoh u pud u sam jong ka shnong.

Kumban shu pynkynmaw ba ka JSU haka 22 tarik Jymmang kala kyrpad na u Myntri ka Tnad PHE u Marcuise N Marak ba un tuklar lem ban phah maramot noh mardor ia ka surok ba la sniew na Khimusniang sha ka treatment plant ka PHE ha Jowai, West Jaintia Hills.

Haba kren shuh shuh halor kane ka surok, u Waheh Shnong u la ong ba ka Dorbar Khimusniang haduh mynta kam pat shim satia ia ka rai kaba kut halor kane ka surok hynrei ka dang buddien beit ïa kiba bun ki skhim bad ki projek kiba la sahkut la slem hapoh shnong.

U la pynpaw ruh ba ka Dorbar Shnong ka la dep iakren bad ki bor sorkar ban maramot ïa katei ka surok bad ruh ban pyndep noh ia ka surok ba sahkut hapoh ka Scheme Synod jong u snem 2008. U MLA ka Jowai ruh u la dep ban kular ha ka 31 tarik Risaw 2024 ban ai Christmas bad New Year Gift ïa ka shnong lyngba kitei ki surok, la ong u Waheh Shnong.

Ka Dorbar Khimusniang ka la buh jingkylli ruh ia ka JSU Jowai Circle nangno ka ioh bor ban tuklar ia ki kam pynroi jong ka shnong khlem da ïoh jingtip lane jingmynjur na ka Dorbar. Ka la ther tyngeh ruh ïa ka sorkar halor ka jingbym shimkhia ia ki jingkyrpad jong ka Dorbar Shnong

Haba jubab pat ia ka jingpynshai jong ka JSU ba ka lah ban trei ia kino kino ki kam pynbha hapoh ki shnong ka rilum Jaintia, u Waheh Shnong u la ong ba ka Dorbar Khimusniang kam pat donkam satia ia kino kino ki kynhun sengbhalang lane riew shimet ban iatrei lang, namar ki kam shnong baroh ki dei ban long hapoh ka jingpeit ka Dorbar hi.

U la bynrap da kaba ong ba lehse ka JSU kam pat sngewthuh ia ka rukom treikam, bad ba ka kamram jong ka Jaintia Students’ Union ka dei ban iakren bad ka sorkar halor ki admission, scholarship, college bad hostel ki khynnah pule, ym ban tuklar ha ki kam shnong.

Haba iadei bad ka jingkynnoh jong u President ka JSU ba ka Dorbar Shnong ka leh politik ïa katei ka surok, u Waheh Shnong u la pynpaw ba naduh u snem 1949 haduh mynta, ka Dorbar Khimusniang kam ju shim kabu politik ha kino kino ki kam pynroi hapoh shnong.