Thaw rekod ka Rangdajied United hadien ba pynliem ia ka Mawlai SC da 2-1 ha ka Shillong Premier League

Syllad | The Rising MeghalayaApril 27, 2024

Ka Rangdajied United FC ka la thaw ia ka rekod da kaba jop lynter ha ka lympung ialehkai Shillong Premier League 2023-24, kata hadien ba ka la lah ban pynliem noh ia ka lahduh jong ka samoi kaba la dep ka Mawlai SC da 2-1 ha ka jingiakhun kaba mar ia biangbor haka sngi Thohdieng, kata wat hadien ba ka la hap ban ialehkai satang 10 ngut ha ki 20 minit kiba dang sah shwa kaba kut ka por.

Ha ryngkat ka jingioh khur ia ki 18-point ba pura lyngba ki hynriew tylli ki jingialehkai bad da kaba tam 5-point ia ka Mawlai, ka Rangdajied ka la wan ha ka kyrdan kaba nyngkong ha ka round robin stage jong ka SPL-2023-24.

Ka Mawlai ruh ka la thikna ban rung sha ka semifinal, hynrei ia ka kyrdan kaba ka don ha ka Top 4 yn dang rai.

Ka jingialehkai ka la long kaba itynnad bad kaba mar iabiang bor naduh kaba sdang jong ka kylla step, hynrei ka RUFC ka la ioh ban pynkhih nyngkong ia ka jar lyngba u Aenam Jyrwa ha ka minit kaba 37.

Haba bteng ia ka jingialehkai ha ka kylla miet, baroh ki artylli ki team ki la beng ban iakhun tyngeh, hynrei u Basuk Bina ka RUSC u la ban pynbud ia ka kol kaba ar ha ka minit kaba 63, kata hashwa ba u Arlangky Nongsiej un shah beh noh lyngba ka red card namar ka jingpyni nia bad u referee.

Hadien kane ki player ka Mawlai ki la pyrshang borbah ban ioh pynphai kylliang, bad ioh ban pynphai da shi kol lyngba u Arkibor Makhroh ha ka minit kaba 90+2. Ka burom ka leit ruh sha u Kerichard L Marshillong uba mih bujli na ka bynta rang ap kol ba mihkhmat barabor jong ka Rangdajied u Banshanskhem Kharsyntiew uba la lah ban iada ia ka penalty na u kapten jong ka Mawlai u Brolington Warlarpih.

Ka jingialehkai lashai ka 27 tarik sngi Saitjain kan long hapdeng ka Sawmer SC pyrshah ia ka Shillong Lajong FC ha ka por 3.15 nohphai sngi.