Thaw histori ka samla Phoebe Nongrum na ka jingiakop niah kali Dakshin Dare

Syllad | The Rising MeghalayaSeptember 2, 2025

Ka samla Phoebe Dale Nongrum na Meghalaya ka la thaw ia ka histori lyngba ka jingleit iashim bynta ha ka jingiakop niah kali Dakshin Dare Cross Country Rally 2025 bad ban kylla long ka kynthei kaba nyngkong eh ka ban jop haduh lait ylli ki kyrdan ha kane ka jingiakop.

Haba iashim bynta ha kane ka rally kaba san sngi kaba la sdang na Bengaluru sha Andhra Pradesh bad wanphai biang sha Bengaluru, ka Phoebe ka la lah ban pyni ia ka sap ka phong kaba kyrpang ha ryngkat u nongkdew lynti (Navigator) u Venu Kumar uba na Coimbatore uba la jop teng haduh hynriew sien ha ka Two-Wheeler Rally Champion.

Ka Phoebe ka la wan ha ka kyrdan kaba lai ha ka T1 Modified Car Category, bad kaba la ioh rah ia ka nam lahduh hapdeng ki kynthei bad ha ka Overall Standings ka la wan ha ka kyrdan kaba saw (Ki top 5 ki dei kiba la shah jied ban ieng halor ka rynsan).

Kane ka jingjop jong ka samla Phoebe ym tang ba ka la pynskhem ia ka jaka jong ka ha ka Indian Motorsport, hynrei ka la kynjoh ruh ia u mawmer na ka bynta ki nongniah kali kiba dei ki kynthei hapoh ka ri. Ka jingjop ka jong ka ka pyni ruh ia ka jingkiew bad ka jingmih shakhmat jong ki kynthei ban iashim bynta ha ki motorsports.

Haba aijingkren hadien kane ka rally, ka Phoebe ka la pynpaw ka jingsngewnguh ia u nongkdew lynti jong ka, ia ka kynhun bad ki nongkyrshan jong ka da kaba ong ba kane ka jingjop ka jong ka ka dei ka jingiatreilang kum ka kynhun bad ka jingdon ia ka jingshaniah namar ka dei ka jingskhem jingmut kaba na lade hi.

Na ka liang ka Meghalaya Motorsports Society ka la ai ka jingkhublei ia ka Phoebe Dale Nongrum bad ia u Venu Kumar halor kane ka jingjop ka jong ki bad ka jingwanrah ia ka nam ka burom ia ki nongialehkai Motorsport jong ka thain bad ka ri hi baroh kawei.