Tang kawei ka case benami, shen yn pyntreikam da ki kyndon ain: CM

Syllad | The Rising MeghalayaFebruary 24, 2024

U Myntri Rangbah ka jylla u Conrad K Sangma u la pyntip hapoh ka īingdorbar thawain haka 23 tarik Rymphang ba ka don tang kawei ka case benami ba la ujor hapoh ki kyndon Benami Transaction Act.

Haba jubab ia ka jingkylli ba la wanrah da u nongmihkhmat ka VPP napoh Nongkrem, u Bah Ardent Basaiawmoit, u Sangma u la ong ba la pynlong ia ka jingtohkit da kaba pynshong nongrim halor ka jingioh pdiang ia ka jingujor.

Katkum ka jingpynpaw ka jong u, la ong ba nalor kane ka case ym shym la don shuh kino kino ki jingujor ha kaba kadei bad kane ka bynta ha ka lynti kaba dei.

Nalor kata u CM u pyntip ruh ba yn thaw ia ka committee mar ia dep pynbit pynbiang ia ki kyndon aiñ katkum ki kyndon ba la pynthymmai jong ka Benami Transaction Act, 2018. “Ia ki kyndon ha ka jingshiasha la dep pynkhreh hadien ka jingiamir jingmut bad ka tnat ba dei khmih bad shen yn lah ban pyntreikam ia ki kyndon ain,” bynrap u CM.

Shuh shuh u la ong ba ia ki jingujor dei ban ujor hakhmat ki first class magistrate lane ki superintendent of police jong ki district.

Na ka liang u MLA ka Congress na Gambegre, u Saleng A Sangma u la ong ba lada ka sorkar ka shimkhia shisha ban pyntreikam ia kane ka Act yn lah ban tehlakam ia ka jingwan rung kyrthep ki briew kiba na bar.

Nalor kata u la kdew ruh ha kaba iadei bad ki jingkhynra ba la pynlong da ka KHADC ha kaba la sakhi ba ki trai ri trai muluk ki la pyrshang ban iada ia ki nongkhaii kiba dei ki bar jylla.