T.70 klur mang ka Sorkar ban tei ia ka experience centre ki jingkieng jri ha Wahlyngkhat, musical centre ha Wahkhen

Syllad | The Rising MeghalayaMay 18, 2025

U Myntri Rangbah ka Jylla u Conrad K Sangma haka 17 tarik Jymmang u la pynlong ka jingleit jurip ia ka jaka ban tei ia ka Living Root Bridges Experience Centre ha Wahlyngkhat kaba hap hapoh Pynursla Sub Division, East Khasi Hills.

Ia kane ka Centre yn tei ha ka jinglut ka ban kot haduh T.70 klur, kaba kynthup ia ka Living Root Bridges Experience Centre bad ka Wahkhen Residential Music Retreat.

Shibynta jong kane ka project ka sorkar kan kyntiew ia ia ki kam pynroi jong ka shnong Mawkyrnot, Rangthylliang bad Mynrieng ha kaba yn pyniasoh ia ki kum ka trekking circuit nalor kiwei pat ki jingtei kiba iadei bad ki kam jngohkai.

U CM u la ong ba ia kane ka jaka la jied halor ka jingdon bun eh ia ki jingkieng jri ha Wahlyngkhat. U pyntip ruh ba ia ka Residential Music Retreat ha Wahkhen kan alad ia ki nongwan shangkai ba kin ioh ia ki jingtip kiba jylliew halor ka tynrai bad ka jingriewspah ka kolshor jong ka jaidbynriew Khasi.

“Ia Living Root Bridge Experience Centre yn sa tei hangne ha shnong Wahlyngkhat. Ka daw ba ngi la jied ia kane ka jaka ka long namar ka don don bun eh ki jingkieng jri, kynthup ia kawei kaba jrong tam ha ka thain bad ha ka jylla. Lyngba kane ka Centre ki nongwan shangkai kiba wan rung ha kane ka jaka kin lah ban sngewthuh pura ia ka kolshor, ka histori, ki buit treikam bad ki jaka bapher bapher kiba don ia kine ki jingkieng jri bad ka ban pynlong kyrpang ia ki nongwan shangkai.Ka dei ka project kaba kongsan bha na ka bynta jong ngi,” ong u Conrad.

U la ong ruh, “Nalor kane baroh ki jaka iaid kjat hangne kan long kawei pat ka jingioh mad ba kyrpad hapdeng ki nongwan shangkai. Ha lynter kine ki jaka iaid kjat ka don ka shnong Wahkhen kaba ia tip bha halor ki jingtem jingput tynrai, ha kaba ngin buh ia ka Music Centre ha kaba ki briew ki lah ban leit bad ban ioh jinghikai bad ban sngew ia ki jingtem jingput bad jingrwai tynrai.

Ha ka jingleit jurip ia ka ‘Law Kyntang ha Raid Nongblai, u CM u la ong, “Ka dei kaba kham rben ban ia kiwei kiwei pat ki ‘Law kyntang kiba nga la iohi. Ka dei ka jingshem kaba phylla shibun, ka rukom ha kaba ki nongshong shnong hangne ki pynneh pynsah ia ka khlaw baroh kawei, ka jingsumar sukher bad pynitynnad ka long da shisha kaba dei ban aijingiaroh bad ngi la wan sha kane ka jaka ban khmih halor kumno ban lah ban kyntiew ia kane ka thain baroh kawei.”