T.10 lak noh synniang u Dy CM ban tei ia ka iingmane Presbyterian ha Umplu

Syllad | The Rising MeghalayaAugust 26, 2025

Kum ka dak ka jingleh sbun bad ka jingshakri ia ka imlang ka sahlang, u Symbud Myntri Rangbah ka Jylla u Bah Sniawbhalang Dhar u la noh synniang da ka song pisa kaba T.10 lak sha ka Balang Presbyterian Umplu na ka bynta ka jingtei ia ka iingmane.

U Bah Sniawbhalang uba dei u MLA ka Nartiang constituency u la pynpaw ka jingsngewnguh ia U Blei uba la kyrkhu bad ban jur ia ka jinglong ba kongsan ban ai ka jingshakri na ka bynta ka imlang ka sahlang.

U la ong ruh ba wat hapdeng ka jingiapher ha ka sain pyrthei, hynrei ka long kaba kongsan ia ki dkhot ka imlang sahlang ban iatreilang halor ki kam ki ban aijingmyntoi ia ka Balang bad ia ka imlang sahlang hi baroh kawei.

U la bynrap ruh ba kane ka jingnoh synniang ka jong u ka dei tang ka dak jong ka jingsngewnguh ka jong u ia ki nongshong shnong bad ka lynti ban kyrshan lem ia ka pyrshang ka jong ki.

Na ka liang u Rangbah Balang u D Lamare u la pynpaw ka jingsngewnguh na ka liang ka Balang na ka bynta kane ka jingnoh synniang jong u Bah Sniawbhalang ha kaba iadei bad ka jingpyntrei ia ka iingmane.