Synniang ka Synjuk Waheh Chnong Jowai sha ka seng KYM ban kyrshan iaka mukotduma NGT halor ka Wah Myntdu

Syllad | The Rising MeghalayaAugust 20, 2025

Ka Synjuk ki Waheh Chnong Jowai kala synniang da ka song jingiarap kaba T. 20,000, shaka seng Khooid Yaka wah Myntdu (KYM) ban kyrshan iaka mukotduma jong ka KYM ha National Green Tribunal (NGT) halor ka Wah Myntdu.

Ia kane ka mukotduma ka NGT (Principal Bench), New Delhi kala buh sngi ban pynlong iaka hearing haka 22 tarik Nailar. Ka Mukotduma ka long halor ka jingshah pynjulor ki sawdong sawkun ka Wah Myntdu kaba mih naka jingshna iaka surok Jowai Bypass na Khliehtyrshi sha Treiongriang nalor kiwei kiwei ki jingpynjot pynpra kiba ktah iaka wah kynthup iaka jingtih maw shyiap bad ka pyntuid jakhlia sha ka wah.

U vice president ka Synjuk Waheh Chnong Jowai Ma Riquoma Rq. Laloo, u general secretary ka Synjuk Ma Bimee Suwer bad kiwei kiwei kila aiti iaka song pisa ha u president ka Khooid Yaka Wah Myntdu Ma Khroo L. Pariat haka jingialang lyngkot kaba la long haka 19 tarik Nailar ha Chilliangraij Jowai.

Na kaliang u president ka Khooid yaka wah Myntdu Ma Khroo Lamsalanki Pariat u pynpaw ka jingsngewnguh ki baroh kiba iadon bynta ban kyrshan bad synniang jingiarap na ka bynta ban pyniaid shakhmat iaka kam.

Shwa kane ka seng Khooid Ya Ka Wah Myntdu kala ioh pdiang iaka song jingiarap na ka Dorbar shnong Chilliangraij T. 5000, ka Dorbar Shnong Ladthadlaboh T. 5000, bad Dorbar shnong Loomiongkjam T. 2500 kumjuh na u Ma Dawiangbha Passah Chairman bad Ma Daochwa Challam Secretary ryngkat ki dkhot ka Ïeibha Rta Society, Jowai T. 5500.