Synniang ka KSU da ka tin sopïing sha ka lanot eriong

Syllad | The Rising MeghalayaMay 28, 2020

Ka KSU War Jaintia Circle haka sngi Balang ka la leit ban ai jingiarap da ki tin sopiing ia kawei longïing kaba la julor ka iing na ka jijng lyngshop ka eriong Amphan.

Katei ka longiing kaba shah ktah bad pynjulor haka eriong ka dei jong i Kong Jarly Phyllein  kaba na ka shnong Amlari Rim, Amlarem Sub Division, West Jaintia Hills District.

“Haka jingleit jngoh ka jong ngi iakatei ka longiing ngi la lap ba kadei shisha ka longiing kaba duk bad kaba shem jynjar bad ka jingshah pynjulor ka iing ka sem jong katei ka longiing haka eriong ka pynlong ia ki ban mad iaka jingeh kaba khraw” la ong u Samla Laitphar Syngkrem President ka KSU War Jaintia Circle.

“Ngim lah shuh tang ban shu peit daki khmat lajong iaka jingshem lanot jong ki paradoh parasnam, kumta ngi naka liang ka KSU ngi la hiar ban noh synniang daka tin sopiing iakatei ka longiing kum ka dak ban ia kyrshan lem paradoh parasnam” la ong shuh shuh u Samla Laitphar Syngkrem.

Ha kane ka jingleit ai jingiarap ka KSU War Jaintia la iadonlang ruh ryngkat u General Secretary ka KSU War Jaintia Circle U Samla Lurman Talang, bad ki dkhot ka KSU War Jaintia Circle.