Synjor ka jingkieng Umpyai, dawa ka HANM ban shna thymmai

Syllad | The Rising MeghalayaFebruary 6, 2021

Ka Hynniewtrep Achik National Movement (HANM) hapoh ka jingïalalam jong u Working President jong ka East bad West Jaintia u Pynshngain Papang ha kine ki khyndiat sngi ka la leit ban jurip ïaka jingkieng Umpyai ba don hapoh u pud u sam jong ka shnong Mynksa, West Jaintia Hills District.

U Pynshngain ula ïathuh ba ki leit jurip ia kane ka jingkieng hadien ba kila ioh ka jingujor ba don ka jingorpait ha katei ka jingkieng na ka bynta ba shapoh jong ka jingkieng kaba ki nar kila sarang bad shong synjor.

La kynnoh ba ka jingsynjor jong ka jingkieng kadei namar ka jingïaid sahuh jong ki trok kiba la kit palat pud wat la ka PWD kala khang pyrshah ban kit palat 9 ton.

“Kane ka jingkieng ka don haka jingma bad kam long shuh kaba shngain ban iaid ki kali heh (trok). Ka tnad PWD kadei ban shimkhia ban shna thymmai noh ia kane ka jingkieng ban shngain u paidbah nongleit nongwan bad ban lait na kino kino ki jingjia ba sngewsih hadien habud,” la ong u Pynshngain.

Kane ka jingkieng ka pyniasoh bun tylli ki shnong naduh ka shnong Mynksa, Khlookynrin, Byrwai bad kiwei kiwei.

Ka HANM kala dawa na ki bor ba dei peit ban pyrkhing iaka leit ka wan ki kali heh bad ban shna thymmai noh iaka jingkieng.