Syllad ka jingpang ‘Dengue’ ia ki bynta ka jylla iap uwei, shah ktah 44 ngut

Syllad | The Rising MeghalayaOctober 13, 2023

Ka jylla Meghalaya ka la sakhi halor ka jingsyllad jong ka jingpang Dengue naduh kine ki khyndiat sngi ba la dep kaba la shim ruh ia ka jingim jong uwei u briew bad ka jingioh pang jong ki 44 ngut kiwei pat, ong ka Myntri ka Tnat ka koit ka khiah ka Kong Ampareen Lyngdoh hynne ka sngi Thohdieng.

Kane ka jingpang ka la kham syllad borbah ha ki thain Garo Hills ha kaba utei uba la khlad noh u dei napoh Tura, West Garo uba la ioh ia ka jingpang brain haemorrhage namar ka jingshah ktah jur ha kane ka jingpang dengue.

Na ka liang kane ka Myntri ka la pynpaw ba kane ka jingpang ka la sdang ban pur ha ki bynta jong ka Garo Hills naduh ka 3 tarik mynta u bnai, bad na ka liang ka tnat ka koit ka khiah ka la dep ban khmih bad eksamin bniah ia haduh kumba 77 ngut ki briew.

Da kaba kyntu ia ki paidbah ba kim dei ban klumar jingmut, hynrei na ka liang ka Myntri ka la kyntu pat ia ki paidbah ba ki dei ban shim ia ki lad jingiada na kane ka jingpang kaba mih lyngba ki skain pyrjong hynrei ka dei pat ka jingpang kaba iabit para briew.

Nalor kata kala kyntu ruh ia ki paidbah ba kin shim ia ki lad jingiada da kaba phah eksamin ha ki jaka sumar kiba hajan eh, kata kum ki PHC ki CHC lada jia ba ka jingpang ba jur ka jingshit bad ban bud ryntih ruh ia ki kyndon ka tnat ka koit ka khiah ban iada na kane ka jingpang.

Shuh shuh ka la pynpaw ba na ka liang ka tnat kam shym la iohi satia ba kane ka jingpang kan saphriang sha kiwei pat ki jaka, hynrei ka la ong pat ba na ka liang ka tnat ka la kyntu ia baroh ki district ban long kiba husiar bad ban bud ryntih ia ki kyndon ba la bthah da ka tnat ka koit ka khiah, kata naduh ki nongshong shnong, ki dorbar shnong, ki municipal board, ki heh ka tnat BDO, ki heh ka tnat ka koit ka khiah hapoh ki block ban shim mardor ia ki sienjam lada ki sakhi ia ki dak ki shin kiba iadei bad ka jingsaphriang jong kane ka jingpang.

Image by Himas Rafeek from Pixabay