Super Division EJHDFA: Jop Thangskai Tiger bad ka Rymbai Iawpynsing, hiar ka Khilehriat West sha ka First Div

Syllad | The Rising MeghalayaNovember 30, 2024

Ka Thangskai Tiger kala jop da 4-1 iaka Ladrymbai B SC bad ka Rymbai Iawpynsing kala pynliem da 5-0 iaka Khliehriat West haka jingialehkai Super Division kaba pyniaid daka East Jaintia Hills District Football Association (EJHDFA) kaba long ha madan artificial turf, Diengshynrum haka 30 tarik Naiwieng.

Ha lyndet kane ka namjop ka Thangskai Tiger ka dei ka jinglah jong u Ruki Syrti (33, 39) ban thep ar kol marwei kaba la lam lynti iaka Thangskai Tiger ban khur iaka jingjop, mar shikol da u Pynthymme Rymbai (30 P) bad u Dukijuh Rymbai (17). Shikol ka Ladrymbai B la thep da u Laxman Rymbai (61 P).

Katba ka Rymbai Iawpynsing pat kala pynliem da 5-0 iaka Khliehriat West. Da kane ka namrem ka Khliehriat West hadien ka jingbym lah ialehkai bha mynta ka aiom kala hap ban hiar noh sha ka first division haka aiom ialehkai ban wan.

U namtam na kane ka jingiakhun na ka bynta ka Rymbai Iawpynsing u dei u Kiming Dkhar uba la ioh ban khyrwit da ka hattrick lyngba ki kol kiba ula thep haka minit (67, 71 & 90+1), bad ar kol la thep da u Hesmiki Rymbai (60) bad Slander Nongtdu (64).

Hadien ka jingiakhun kaba mar 6 sien, ka Dhana CSC ka bat iaka kyrdan kaba hakhliehduh haka miej iakhein da kaba kur 12 poin da kaba tam da ka jingpher kol, bud ka Thangskai Tiger 12 poin, Sutnga SSCC 12 poin, Rymbai Shkenshynriah 10 poin, Chiehruphi SYWSC 10 poin, Rymbai Iawpynsing SC 5 poin bad ka Ladrymbai B SC 4 poin. Ka Khliehriat West YWSC 1 poin.

Ka jingialehkai kiba sah ka long sa tang mar shi sien, kata haka 3 bad 4 tarik Nohprah ban iaknieh rung top 4 ban iakhun iaka semifinal (qualifier bad eliminator). Haka 3 tarik ka Rymbai Iawpynsing kan aireng pyrshah iaka Laadrymbai B, ka Khliehriat West pyrshah iaka Thangskai Tiger. Haka 4 tarik pat ka Dhana kan iakhun pyrshah iaka Chiehruphi bad ka Sutnga SSCC pyrshah iaka Rymbai Shkenshynriah.