Suba shah rahbor ka samla 17 snem na ka dukan ba ka trei ha EWKH

Syllad | The Rising MeghalayaAugust 26, 2025

Kawei ka samla lud kaba dang 17 snem rta ka jah rngai na kawei ka dukan kaba ka trei bylla ha ka shnong Permadan ha Eastern West Khasi Hills District mynta lah shiphew sngi kynthih.

Katkum ka ejahar ba la mudui hapoh Mairang Police Station la iathuh ba kane ka samla kaba kyrteng ka Ribaiahun Marngar kaba dei na ka shnong Permadan ka la jah rngai na ka dukan kaba ka trei naduh ka step jong ka 15 tarik Nailar.

U Superintendent of Police ka District u la ong ba la suba jur ba kane ka samla ka la shah rahbor ha uwei u briew uba kyrteng u Thomborlang Sohphoh uba dei na ka shnong Umdum bad haduh mynta ym pat shym la lapdien satia ia ki.

Na ka liang ki pulit ki la pynlong ia ka jingtohkit ban lapdien ia kane ka samla kaba jah rngai bad la register case ruh halor kane ka jingjia hapoh Mairang Police Station ha ka kyndon 137(1)(b)(2) BNS, 2023 bad mynta ka jingtohkit kala iaid shakhmat.

Kane ka samla ka don ka rynieng kumba 5 phut, kaba shai sniehduh, ka don u shniuh uba jrong bad ka phong da ka blouse rong lieh kaba don ki dur khlur, ka jainkyrshah rongktieh thoh lain lieh bad ka patlun iong kaba thoh lain lieh.

La kyntu ruh ia kino kino kiba don jingtip ne iohi ia kine ki arngut ba kin sngewbha ban pyntip sha ka ophis lane sha une u nombor 6009308959, ha kaba yn buhrieh ia ka kyrteng jong ki nongai jingtip.