Suba iasylla ka sorkar bad ki karkhana dewbilat, yn rai ka Meghalaya HC ban pyniar jingtohkit

Syllad | The Rising MeghalayaOctober 31, 2023

Ka Iingbishar Meghalaya High Court haka 30 tarik Risaw ka la pynpaw ba kan ai ka jingmynjur ne ka rai na ka bynta ban pyniar ia ka jingtohkit halor ka jingsuba donkti bad leh sop sop hapdeng ka Sorkar Jylla bad ki karkhana dewbilat kiba don hapoh ka thain  East Jaintia Hills District.

Ia kane ka hukum la pynmih hadien ba u nongmudui PIL u Shailendra Kumar Sharma, uba kam ialade kum riew trei kam bhalang bad uba kren ia shibun ki mat kiba iadei bad ka jinglong jingman ha ka mariang, ula wanrah ia ki jingshisha kiba buh jingma haba iadei bad ka jingtreikam jong ki karkhana dewbilat hapoh East Jaintia Hills District.

“Na ka liang u nongmudui u la buh ka jingkyrpad na ka bynta ban pyniar shuh shuh ia ka jingtohkit, kata kynthup halor ka jingsuba donkti ka sorkar jylla bad ki hynniew tylli ki kompeni dewbilat, bad ia kaba yn sa bishar ha jingshong bishar ka ban long biang ha ka 7 tarik Naiwieng u bnai wan,” ong ka iingbishar kaba kynthup ia u Chief Justice Sanjib Banerjee bad u Justice B Bhattacharjee ha ka jingpynmih hukum.

Katkum ka jingpynpaw da u nongmudui, kine ki hynniew tylli ki kompeni ki la ioh ia ka jingbit na ka sorkar jylla na ka bynta ban pyntreikam ia ki karkhana dewbilat ha ryngkat bad ka jingpynmih bording ne ka power plant kaba 10 MW, hynrei ki la pynmih kham bun shuh shuh ka dewbilat ban ia kaei kaba la buh da ka sorkar katkum ka shithi jingiamynjur kaba ha ka 13 tarik u Naiwieng 2008.

Nalor kata u nongmudui u la kam ruh ba ki kam tih mar pohkhyndew, kata ha kaba iadei bad u Mawshun ka dei kaba la leh da kine ki hynniew tylli ki kompeni khlem da ioh satia ia ka jingbit ne license.

Shuh shuh katkum ka hukum la ong ba ha kaba kum kane ka bynta, u nongmudui u pynsngew halor ki jingkylli ba la buh da ka Union Ministry of Mines kaba khmih ia ki marpoh khyndew ha ka 2 tarik u Lber 2022 bad kam ruh ba ka jubab jong kine ki hynniew tylli ki kompeni ia kine ki jingkylli kim shym la pynpaw satia ha kaba iadei bad ka jingdon ia  kino kino ki license tih mawshun.

Kumta ruh na ka liang ka iingbishar ka la bthah ba baroh ki nongshah mudui kynthup ia kine ki hynniew tylli ki kompeni ba ia kane ka kam yn sa khmih biang hadien shitaiew na ka bynta ban ai jubab halor ki jingbuh jingkylli da u nongmudi halor kane ka bynta.