Step Muchai Behdieñkhlam

C. Pynsakhiat Yeini KyndiahJuly 4, 2020

Ha ka step Muchai dang step synñiaw,
Ka sngi wa khatdooh ki soo sngi Lee ïaw.
Khon ka loompyrdi da ïa mih waroh,
Khmat chynrang u ïalai cha ïung Langdoh.

Choh wa put ka boom ka Bhuri,
Ïa pyllang paitbah ha myngkoi pyrdi.
Manda poi u Sangot Pakyntein wow Harnamooid,
Ïoh u tyngkheiñ ïei por I samooid.

Dieñ she dieñ chan ha tympha ïong ki,
Ngooh dem da’u Kñi ka loompyrdi.
Heitae ïoh u tyngkheiñ ïow snem ïow bnai,
Ïoh u paan ïei kyrkhu ha pyrthai.

Na Myngkoi pyrdi hadooh wapoi ïung Langdoh,
Wa ïa risa wa ïa kynhoi waroh waroh.
Khmat chynrang waki dieñ khlam Khian ha kti wa ksoh,
Ïoh u lai li kyntiñ khnong cha ïung Langdoh.

U Harnamooid ïa ka boom heitae darah,
Ïa ka Loompyrdi cha ïung Langdoh u ïah.
Chibet chipsoh u Chad ha ïung Langdoh manda poi,
Ha ka sien wa nyngkong u e pyrnah na’u Dolloi.

Ïow klong ïow skoo u Dolloi da e kti,
Ïoh u bujai u sarai da’u Kñi ka loompyrdi.
Ïa ki Blai ki Syiem wa ngooh wakhut wa tiñ,
Dep neitae ïa ki Lee tylli ki khnong ïoh u kyntiñ.

Dep neini bait bait cha Myngkoi pyrdi,
Ka sien wa nyngkong dadep chooh I.
Ka niam da pyndep ka rukom ka jooh hi,
Pher du ka ñia ka ïutang donhi.

U Harnamooid darah ïa ka boom naka jooh ka luti,
Ha ka sien wa ar cha ïung Langdoh biang u lai I.
Sa na’u Langdoh ïei pyrnah u e kti,
Ïoh u bujai u sarai biang u Kñi ka loompyrdi.

I jooh I rukom pyndep kam ka sien wa nyngkong,
Hajrong hi ki Hukum waki Adong.
Dep neini ïoh u sdang noh ka choh thyndai,
Haman ki thyndai ïung ïei kyrkhu u paan naki Blai.

Kai parom donhi heini ïoh u khana,
Ha’u ni u snem wada pher neiwa nachwa,
Han kattae ai leh biang thij ki kaam niam waroh,
U pynhun ïei mon ki Blai u diang ïei kyrkhu khyrdoh.