Sospon ka NEHU ia u Professor ba shah kem ha ka CBI halor ka jingdonkti bamsap

Syllad | The Rising MeghalayaJune 21, 2025

Ka North Eastern Hill University (NEHU) ka la sospon ia u Senior Professor ka Zoology Deparment bad Dean jong ka School of Life Sciences, u Nirmalendu Saha hadien ka jingshah kem ba dang shen ha ka Central Bureau of Investigation (CBI) halor ka kam bam pisa kaba kot T.3.43 lak.

“Ha kaba iadei bad kane ka case ia u Prof. N. Saha, katkum ki kyndon la khein ba u la shah sospon noh hadien ba u la shah set along 48 kynta ha ka CBI. Hadien ba la ioh ia ka jingpyntip na ka CBI, ka Skulbah ka la pynmih ia ka shithi sospon pyrshah ia u Prof Saha,” ong u kyrwoh PRO ka NEHU haka sngi Thohdieng.

Ha ka 12 tarik Jylliew, ka CBI, Guwahati ka la kem noh markhmat ia u Professor Saha bad ia uwei pat u riew shimet uba dei u trai jong kawei ka kompeni na Guwahati, Assam ha ka por ba ka dang don ka jingai bad jingshim pisa kaba kot T.3.43 lak hapoh Guest House ka Guwahati University, Guwahati.

Ka CBI ka la register case ha ka 11 tarik Jylliew 2025 pyrshah ia u Nirmalendu Saha bad ia u Pranjal Sharma uba shong ba sah ha Beltola, Guwahati, Assam katba ki dang ia suhbuit ban leh ia ka kam bamsap ha kaba une u professor un pynioh ia ka kam supply ha kaba iadei bad ka jingthied ia ki tiar saian, laboratory bad kiwei pat bad u trai jong kawei ka kompeni bad ban pynkhuid ia ki bill na ka bynta kane ka kam.

Na ka liang ka CBI ka la pynlong ia ka jingpynap shrip bad ioh ban kem noh markhamt ia une u Professor ha kaba la ialam noh ia u shapoh ka Iingkashari ha Guwahati ha ka 12 tarik Jylliew 2025.