Snohktilang ka shnong Umran bad ka 6th MLP Bn ban iarap ia kiba duk ba suk

Syllad | The Rising MeghalayaDecember 5, 2020

Ka 6th MLP Battalion hapoh ka jingialam khmat u Bah Lakador Syiem, Commandant kum shi bynta jong ka thong “Reaching Out-Beyond the Call of Duty” ka prokram ban iarap ia ki ba duk ba suk haka imlang ka sahlang kala sam blanket sa haka shnong Umran Dairy, Ri Bhoi District haka sngi Thohdieng.

Kane ka jingsam blanket ka 6th MLP Bn ka dei ka sngi kaba saw kaba la sdang naduh 1 tarik une u bnai Nohprah.

Ka Dorbar Shnong hapoh ka jingialam u Ranghah Shnong Bah Lambor Mukhim Bina ha ryngkat u secretary shnong bad ki dkhot Dorbar Shnong kila snohktilang bad shim bynta shitrhem ha kane ka jingai sngewbha da ki blanket sha ki paidbah.

Ka Bor shnong kaba la ioh mynsiem da ka jingsynniang jong ka 6th MLP BN ha ki lai tylli ki shnong, kala sam nakaliang jong ka ruh sha ki nongshong shnong. Ka 6th MLP BN kala sam 50 tylli sha ki rangbah bad 100 tylli la sam da ka shnong sha ki longkmie jong ka shnong Umran Dairy.

Ha kane ka jingsam blanket uwei u khynnah rit uba la tip kyrteng kum Alden Kurbah kum ka dak ban burom iaki pulit ula phong da ki sopti pulit jong u hi.

Shuh shuh kum ka dak ban ai burom iaki briew kiba mih hakhmat ban iakhun iaka khlam COVID-19 hapoh shnong, la pynkup burom ia ki 5 ngut kiba trei kum ki  Anganwadi bad Asha bad la ai sngewbha ruh iaki da ki blanket.

Namar baka shnong Umran Dairy kalong kaba heh kaba don 3 tylli ki kyntoit/dong kiba la kot kumba 400 iing, ki Pulit 6th MLP BN kila aiti sa 20 tylli ki blanket sha u Rangbah Shnong ban sam sha kino kino kiba donkam ia kine blanket.

La ioh ka jingkren lyngkot na u Rangbah Shnong bad Secretary, katba na kaliang ki 6th MLP BN la kren da u Bah R Rapsang Head Assistant jong ka ophis u Commandant 6 MLP BN.