Snohkti ka Jowai & Balang Presbyterian Mawlai Nongkwar ban rakhe iaki sngi ai snam sngewbha, ai burom ia uba ai snam haduh 10 sien

Syllad | The Rising MeghalayaOctober 1, 2020

Ka 1 tarik u Risaw kadei ka sngi kyrpang ban ai snam sngewbha kaba la tip kum ka National Voluntary Blood Donation Day (NVBDD) bad ia kane ka sngi la rakhe kylleng ka Ri India. Ka jingrakhe ia kane ka sngi ka dei kum shi bynta ban ai burom bad khublei ia ki briew kiba ai snam sngewbha naka bynta ban iada iaka jingim briew.

La rakhe ia kane ka sngi ban ialap ban pynsngewthuh ia ki nongshong shnong halor ka jingkongsan ka jingai snam ban iarap iaki longkmie kiba kha kiba pun, ban iarap iaki paidbah kiba don jingshitom haka jingpang snam blood dyscrasias bad haba jia ki aksident bad kiwie kiwei kiba donkam snam kyrkieh ban iarap iaki para briew.

Ka snam kalong kaba kordor iaka jingim u briew haka pang ka shitom bad ha kino kino ki jingjia kum iaki lanot lyngshop bor mariang, kiba mynsaw mynsnam na ki aksident bad ka donkam ban don ki jaka kynshew snam kiba biang ban ioh ai snam ia kino kino kiba donkam snam kyrkieh.

Ka mat pdeng jong ka National Voluntary Blood Donation Day mynta u snem ka long “Lets donate blood voluntarily and contribute to the fight against CORONA”.

Ha Jowai la rakhe ia kane ka sngi da ka Jowai  Civil  Hospital  Blood Bank haka jingiatreilang bad ka Meghalaya AIDS Control Society  Shillong  & State Blood Transfusion Council ha  Jowai Blood Bank, Panaliar.

Ka mat pdeng kalong “Safe Blood Save Lives”.

Ka Dr. P Shylla kaba dei khmih iaka Jowai Blood Bank kala ai khublei bad iaroh ia baroh kiba wan ai snam sngewbha haka Jowai Blood Bank ban kyrshan ia kane ka jaka kynshew snam ban ai ka jingshakri sha ki paidbah ba donkam snam.

Ha kane ka sngi la pynkup burom iaka Jingiaseng  Samla Balang  Presbyterian  Jowai, North  East Adventist  College Khliehtyrchi, Sevenday Adventist  Church Ladthalaboh, Cleanliness  & Sanitation Committee  Kiang  Nongbah  College  Jowai, Dorbar  Shnong  Chilliangraij  Jowai.

La ai ruh iaka khusnam kaba kyrpang sha u Job R Kawlni uba wan shakhmat ban ai snam sngewbha ha kane ka jaka kynshew snam haduh 10 sien.

Kala don ruh ka jingai snam sngewbha mynta ka sngi da ki 7 ngut ki samla na Jingiaseng Samla Presbyterian Church Jowai  bad North  East Adventist  College.

Shuh shuh ha sor Shillong ka Meghalaya AIDS Control Society ha ryngkat ka jingiatreilang ka  Jingiaseng Samla Balang Presbyterian, Mawlai Nongkwar bad ka Meghalaya State Blood Transfusion Council kila rakhe iaka NVBDD ha phyllaw ka Presbyterian Church, Mawlai Nongkwar haka jingiadonlang  Dr.(Mrs) R Allya, Project Director, Meghalaya AIDS Control Society, Shillong, Dr (Mrs) C Budnah, Member Secretary, Meghalaya State Blood Transfusion Council, Bah AMS Kharsati, Chairman, Jingiaseng Samla Balang Presbyterian, Mawlai Nongkwar nalor kiwei kiwei.

U  Sampath Kumar,IAS, Commissioner & Secretary, Health & Family Welfare Department, Govt. of Meghalaya ryngkat bad u Shantanu Sharma, IAS, Joint Secretary, Community & Rural Development & CEO, Meghalaya State Rural Livelihoods Society, APD, Meghalaya Basin Development Authority, Govt. of Meghalaya kila mih shakhmat ban ai snam sngewbha ha kane ka sngi.