Sngewkhia u Myntri ba kyntait don bynta ki liang pyrshah ha ka APC halor ka lynti rel

Syllad | The Rising MeghalayaMay 10, 2025

U Nongialam ka United Democratic Party (UDP) uba dei ruh u Myntri Sorkar, u Bah Paul Lyngdoh haka sngi Thohdieng u la pynpaw ka jingsngewkhia halor ka rai jong ki party liang pyrshah ban ym ia don bynta ha ka All Party Committee kaba thmu ban shong bishar bniah halor ka jingtyrwa ban pyntreikam ia ki project lynti rel ha ka jylla.

Kane ka jingpynpaw ka jong u ka la wan long ruh hadien ba ka Congress bad ka Voice of the People Party (VPP) ki la pynbna ia ki rai jong ki ban ym iashim bynta ha ka jingialang ka ban wan jong ka All Party Committee ba la thaw da ka sorkar jylla.

“Ha ka jingshisha ngam tip kaei kaba la pynlong ia kaba kum kane ka jingleh namar kane ka dei ka kam kaba khia haduh katta katta ia kaba la ju iakren na ka por sha ka por, bad ngi nang tharai ba ka All Party Committee ka dei ka rynsan kaba biang tam ban iathir namar phi lah ban iohsngew ia baroh ki jingai jingmut, ki jingkynthoh pyrshah bad ki jingpynpaw ba shah liang,” ong u Bah Paul haba kren sha ki lad pathai khubor.