Sngewkhia u MDC Tura bym iahap ka jingioh scholarship kumba la kular da u CM ka Jylla

Syllad | The Rising MeghalayaJune 23, 2025

U Nongialam ka BJP uba dei ruh u MDC ka Tura u Bernard N Marak u la pynpaw ka jingsngewkhia kaba jur halor ki jingkynnoh ba ka don ka jingiahap ha ka jingioh pdiang ia ka scholarship lyngba ka Chief Minister’s Scholarship Scheme.

“Wat hapdeng ka jingpynbna da u Myntri Rangbah ka Jylla u Conrad K Sangma ia ka scholarship kaba T.6000 na ka bynta uwei pa kawei ka khynnah pule ha ka por jong ka Dorbar Mangtyngka kaba la long ha ka 5 tarik u Lber 2025, hynrei kiba bun ki samla pule ki la ioh duna ia kaei kaba la kular,” ong u Marak lyngba u kyrwoh haka Sngi U Blei. 

Katkum ka jingong ka jong u, ki la ioh pdiang ia kiba buntylli ki jingujor na ki samla pule kiba dei na ki college bapher bapher ha kaba iadei bad kane ka phang.

U la ong ba ki don katto katne ki samla kiba ioh tang T.1500, 2000 lane T.3000 ha ka jaka jong ka T.6000 kumba la kular. Katto katne ki samla ong ba ka pisa ba la thep sha ka account jong ki kam shym la paw ha ki account statement jong ki.

“Kane ka jingbym iahap ka la lam sha ka jingklumar bad ka jingartatien hapdeng ki samla pule kiba la ap khmih lynti ia ka scholarship na ka bynta ban kyrshan ia ki jinglut jingsep jong ki ha ka pule puthi. Kane ka scholarship ka thmu ban aijingmyntoi sha ki palat 80,000 ngut ki samla pule, hynrei kane ka jingioh kaba duna ka la pynmih ia ki jingkylli halor ka rukom pyntreikam bad ka rukom pyniaid ia kane ka prokram.

Une u MDC u la kyntu ia ka ophis u Myntri Rangbah (CMO) ba kan shimkhia halor kane ka jingdkoh bad ban pynbeit pat ia kane ka bynta khnang ban pynthikna ba ia kane ka scholarship kaba T.6000 kumba la kular yn lah ban sam sha baroh ki samla pule kiba la pyndep ia ka matrik.

“Kan long kaba sngewtynnad lada ka CMO kan shimkhia halor kane ka jingdkoh ha ka jingpyllait ia ka CM’s scholarship scheme khnang ba kum kane ka jingklumar jingmut bad jingartatien kan ym jia shuh hadien habud, bad khnang ba kan long ka jingmyntoi khamtam ia ki samla pule kiba wan na ki longiing kiba duna ha ka ioh ka kot lyngba ka jingpyllait ia kane ka pisa kaba T.6000 marwei kumba la kular na ka bynta kine ki samla pule,” u la ong.

Ka Sorkar Meghalaya ka la mang haduh T.48 klur khnang ba ka jingpyntreikam ia kane ka skhim kaba thmu ban aijingkyrshan sha ki palat 80,000 ngut ki samla pule kiba la pyndep ia ka matrik hapoh ka jylla kan long kaba jop.