Sngewkhia jur u Myntri ka tnat Pule Puthi halor ka jingduna ki khynnah skul ha ki kyrdan Primary bad Upper Primary

Syllad | The Rising MeghalayaOctober 10, 2023

U Myntri ka Tnat pule puthi ka sorkar jylla u Rakkam A Sangma haka sngi Nyngkng u la pynpaw ka jingsngewkhia kaba jur ha kaba iadei bad ka jingduna ka jingdon jong ki khynnah skul kiba pule ha ki kyrdan Primary bad Upper Primary School hapoh ka jylla.

Haba kren sha ki lad pathai khubor u Sangma u la ong; “Ka long kaba sngew bynniaw shibun ban iohi ia ka jinghiar arsut ka jingdon jong ki khynnah kiba pynrung kyrteng ialade hapoh ki kyrdan primary bad upper primary school ha ka jylla.

U la ong ruh ba katkum ka jingioh jingkhein da ka tnat pule puthi ka sorkar pdeng, ka jylla Meghalaya ka don 168 tylli ki skul primary bad 101 ki skul upper primary kiba don duna ia ka 10 ngut ki khynnah skul.

Halor ka jingkylli na ka liang u Sangma u la ong ba ka jingkhang khyrdep ia kiba kum kine ki skul ka lah ban ym long ka lynti kaba lah ban iarap. Hynrei u la ong ruh ba na ka liang ka sorkar kan shim ia ki lad ki lynti hadien ba ka la bishar bniah ha kaba iadei bad kane ka jingdon jong ki khynnah skul.

Ka jingduna jong ki khynnah kiba rung skul ka dei ka bynta kaba sngewkhia jur bad kadei ruh ka jingeh kaba khraw ha kaba ngin hap ban iakren bad ki nonghikai kumjuh bad ki bor pyniaid skul. U la ong ruh ba kin hap ban bishar bniah ia ka daw bad halor kane yn phah ruh ban tohkit bniah da ki ophisar ba kin pynlong ka jingleit jurip ia kiba kum kine ki skul khnang ban lap ia ka daw.

Shuh shuh na ka liang u Myntri u la pynpaw ruh halor ka jingdonkam ia ka sorkar ba kan shim ia ki sienjam ban kyntiew ia ka rukom long ne ka standard jong ki skul ha baroh kawei ka jylla.