Sngew skhem u Bah Paul ba ka Meghalaya kan jop ha ka thma drok kumba jop ia ki kam lehnoh
U Myntri ka Tnad Social Welfare u Bah Paul Lyngdoh u la pynpaw ia ka jingsngew skhem ba ka jylla kan jop ia ka thma pyrshah drok da kaba kdew ruh halor ka jingjop ia ki kam lehnoh ha ki snem kiba la leit noh da kaba pyndonkam tang da la ki jong ki bor pulit khlem da donkam khot ia ki shipai kumba leh ha kiwei pat ki jylla jong ka thain.
Hadien ka jingpynkup burom ia ki phra ngut ki pulit na ka Anti Narcotic Task Force (ANTF) ha ka 21 tarik Nailar hadien ka jingioh kurup ia u drok uba shongdor haduh T. 4 klur na East Jaintia Hills, u Bah Paul u la kdew ia ka jinglah jong ka jylla ban iakhun pyrshah ia kine ki jait jingdih pynbuaid da kaba ioh ban kurup ia kine ki jait jingdih kiba kot palat T.400 klur ha kine ki san snem ba la dep.
“Kane ka pyni ba ngi don ia ka jingshemphang ha ka jingtreikam, ka jinglah bad ka jingdon ia ka mon ban iakhun pyrshah ia kane ka jingeh bad pynthikna ban rat dyngkhong syndon,” u la ong.
U Bah Paul u la shim ruh ia kane ka jingiakhun pyrshah drok kum ka kam ‘pyniap ne shah pyniap’ bad ong, “Ngi lah ban shah jop ha ka ne ba ngin kylla kum ki nongjop. Ngi lah ban kylla long ki lanot ne ki nongjop. Nga thikna ba ka Meghalaya kan ioh ia ka jingjop ha kane ka thma pyrshah ia u drok.”
Haba pynpaw ka jingngeit kaba skhem h ki bor pulit, u bah Paul u la ong ka Meghalaya ka dei kawei na ki katto katne ki jylla kaba la ioh ia ka jingjop bad rat dyngkhong ia ki kam lehnoh lyngba ka tnad pulit.
“Ngim shym la khot ia ki shipai haba kiwei ki jylla ki hap ban leh ia kata.Ka Nagaland ka hap ban leh ia kata, ka Mizoram ka hap ban leh ia kata, ka Punjab ka hap ban leh, ki thain ba shah ktah ha ki lenoh Maoist Naxalite ki hap ban leh, ka Assam ruh ka hap ban leh ia kata.Ka Meghalaya ka dei kawei na ki katto katne ki jylla kaba la iakhun hi ia ki kam lehnoh da kaba pyndonkam ia la ki jong ki bor pulit.Katno ngut na ngi ki tip shaphang kata,” u la ong.
Kum ka jylla kaba dang rit tam ha India, u Myntri u la ban jur halor ka jingdonkam ia ki jingbei tyngka na ka bynta ki samla ka jylla kiba don haduh 65% na ki nongshong shnong kiba hapoh ka rta 35 snem, khnang ban pyllait na ki jingpyrshang kiba khring ban pynngop ia ki ha u drok bad kiwei pat ki jait jingdih ba sniew.
U Bah Paul u la pynthikna ruh ba ia ka memorandum ba la aiti da ka ANTF yn pynurlong mardor ia ka jingbei tyngka lyngba ka DREAM project.
U Myntri u la batai ruh shaphang ka DREAM mission kaba kynthup ia ka jingiatreilang kaba jan hadpeng ki tnad bapher bapher, kaba kynthup ia ka Tnad pulit, Social Welfare, Pule puthi, ka Koit ka khiah bad ka Ain.Kane ka jingiatreilang ka thmu ban lah ban iakhun pyrshah ia ki jingeh kiba mih lyngba u drok.
Na ka liang u Bah Paul u la ai ruh ka jingiaroh ia ka jingtrei borbah bad ka jingshlur jong ka Tnad ANTF ban kdiah ia u budlum jong ki kam khaii drok, kaba dei ka jingeh kaba khraw namar ka jinglong jingman ki jaka jong ka jylla Meghalaya kaba dei ruh ka lynti iaid ba pyniasoh bad kiwei pat ki jylla.
Da kaba ong ba ka ANTF ka la banbor tyngeh ia ki nongkhaii beain, u Myntri u la ong ba ka ANTF mynta ka la rung sha ki jaka ia kaba mynshuwa kam pat ju leit satia, kata kum ha Cantonment Board kaba ktem khaii khaii drok kaba shyrkhei bha.
U Myntri u la pynthikna ruh ba ka ANTF kan bteng ban banbor tyngeh pyrshah ia ki nongkhaii drok ba ban rat dyngkhong ia u drok na ka jylla hi baroh kawei.
Halor ka jingtyrwa ban thied ia ki vehicle scanner, u Myntri u la ong ba ka sorkar jylla ka la dep ban kdew ia kane ka jingdonkam bad na ka liang ka Ministry of Home Affairs ka la tip halor kane ka kam.
Facebook
Instagram
Youtube
Twitter
Leave a Reply