Siat tear gas bad bom lathi ki pulit ban pynpra ia ki paidbah ba pyrshah iaka public hearing ka Meghalaya Cement Ltd

Syllad | The Rising MeghalayaAugust 24, 2023

Ki bor pulit ka East Jaintia Hills mynta ka sngi Palei ki la hap ban pyndonkam da ki tear gas ne lyer pynsat khmat bad bom lathi ban pynpra ia ki paidbah kiba pyrshah bad pynthut ia ka jingpynsngew paidbah ne public hearing ba la khot pynlong da ka da ka Meghalaya State Pollution Board (MSPB) na ka bynta ka jingpynheh iaka jingpynmih dewbilat, clinker bad ka jingpynmih bording ka Meghalaya Cement Limited.

Kane ka jingsiat tear gas jong ki pulit kala wan long ruh hadien ba ki paidbah kila thom da ka bor ban rung sha ka jaka pynlong jingialang haka iing sher dara ba la pynkhreh ha madan ball ha phyllaw ka karkhana, kata kaba la wan long ruh wat hadien ba la pynjur bha ia ka jingpahara ha kane ka jaka.

Ka jingpynlong ia kane ka jingpynsngew paidbah ka long ha kaba iadei bad ka jingthmu jong ka karkhana M/s Meghalaya Cement Ltd (Topcem) ban pyniar ia ka jingtreikam jong ka, kata ban pynbun iaka jingpynmih dewbilat naka 2600 TPD (0.858 MTPA) sha ka 4500 TPD (1.485 MTPA) bad ka bording 10 MW CPP and 9.5 MW WHRS.

Na ka liang u Superintendent of Police ka East Jaintia Hills, u Jagpal Singh Dhanao u la ong ba mar ia sdang ka jingialang, ki paidbah ki la thombor bad pynpra naphang ia baroh ka jingker dara ha kane ka jaka pynlong jingialang.

U la ong ba ki pulit ha kaba nyngkong kim lah ban leh ei ei namar ka jingdon bun jong ki kynthei bad khynnah. U la ong ba ki paidbah ki la pyrshang ruh ban thang ia ka dara hynrei na ka liang ki pulit ki la lah ban tehlakam noh.

U SP u la pyntip ruh ba hadien ka jingiamir jingmut bad ki bor pyniaid district kumjuh bad ki heh jong ka tnat Meghalaya State Pollution Control Board (MSPCB), la pynkynriah noh ia kane ka jingialang sha kawei pat ka jaka.

Hynrei ki paidbah ki la thombor ruh ia kane ka jaka pynlong jingialang kaba ar da ka juh ka jingthmu, kata da kaba sdang lyngba ka jingther maw pyrshah ia ki bor pulit. Kumta khnang ban pynpra ia u paidbah na ka liang ki bor pulit ki la hap ban pyndonkam khyndiat ka bor pyrshah ia ki.

Na ka liang ki pulit ki la behthong ia ki paidbah shabar ka phyllaw jong ka karkhana dewbilat hadien ba kila byrthen ban thombor ia ka jaka treikam bad ia ki kali kiba pynieng ha kane ka jaka, ong shuh shuh u heh pulit.

Kham hashwa, kata ha ka 3 tarik mynta u bnai ki sengbhalang ki la dawa na ki bor pyniaid district ba ki dei ban pynsangeh ha kaba iadei bad ka jingthmu ban pynlong ia kane ka public hearing jong ka karkhana M/s Meghalaya Cement Ltd bad ka M/s Green Valley Industries Ltd ha ka 24 bad 25 tarik mynta u bnai.

Ha ka shithi sha u Deputy Commissioner jong ka district, ki sengbhalang ki la pynpaw ka jingpyrshah kaba jur ha kaba iadei bad ka jingthmu ban pynlong ia ka public hearing ha kane ka sngi 24 tarik na ka bynta ban pyniar ia ka jingtreikam jong ka karkhana M/s Meghalaya Cement Ltd ha ka shnong Thangskai bad ha ka 25 tarik na ka bynta ka jingpyntreikam ia ka Shale Mining da ka karkhana M/s Green Valliey Cement Ltd ha ka shnong Brichyrnot.

Na ka liang kine ki kynhun seng ki la pynpaw ba ka jingdon jong kine ki karkhana dewbilat hapoh ka district kim shym la lah ban pynurlong satia ia ki jingdonkam jong ki paidbah nongshong shnong bad jong ka district hi baroh kawei, kata ha kaba iadei bad ka jingai kam aijam ia ki trai shnong nalor ba ka jingwan ki karkhana ka pynjaboh bad pynjulor iaka sawdong sawkun ka mariang.

Kumba  ka long mynta ki don tang khyndiat eh ki trai shnong kiba ioh kam hapoh kine ki karkhana dewbilat.