Siangrong surok tangdep ha Jowai

Syllad | The Rising MeghalayaDecember 2, 2021

Ka jingsiangrong iaka surok haki katto katne ki bynta ka Jowai kala long kaba thurmur ha kaba la lap ba ha ki bun ki bynta kane ka jingmaramot ne pyndap iaki thliew haki jaka ba sniew la shu leh tangdep rukom.

Ki dur kiba la shon dei haka bynta jong ka surok Syntu Ksiar, Jowai ka jaka kaba khring iaki nongwan kai, pynban la lap ba ka jingsiang kala long kaba torti shaba palat liam ha kaba wat ha ki jaka ba siang rong ki dang ieh khlem syrdep ia kaba jot.

Ka jingkylli kaba ki nongshong shnong kila buh hato ki engineer ka PWD kiba kynthup iaki SA, JE, SDO ne EE ki jurip ne em haka por ba siangrong ne kane ka jingmaramot surok ka dei tang ban shna bill ia u contractor jong no re jong no re?

U Ma OR Shallam ula ong ba haba nyngkong kila kmen ban iohi ba ka PWD kala maramot iaka surok, pynban ka jingmaramot kala long kaba tangdep shaba palat pud ha kaba wat ki jaka ba siangrong ruh la shu leh torti.